फैजपूर (प्रतिनिधी) येथील पोलीस ठाण्यातील गोपनिय विभागातील पोलीस नाईक याला ५०० रुपयांची लाच स्वीकारतांना लाचलुचपत विभागाच्या पथकाने अटक केली आहे. दारूचा व्यवसाय नियमित सुरू ठेवावा यासाठी पोलीस नाईक याने लाचेची मागणी केली होती. दरम्यान, या कारवाईमुळे पोलीस दलात खळबळ उडाली आहे.
यासंदर्भात अधिक असे की, तक्रारदार यांचे दारू विक्रीचा व्यवसाय आहे. फैजपूर पोलीस ठाण्याच्या हद्दीत त्यांचे दारू विक्रीचे दुकान आहे. दरम्यान दारू व्यवसाय सुरू ठेवायचा असेल तर दर महिन्याला ५०० रूपये द्यावे लागतील अशी मागणी फैजपूर पोलीस ठाण्यातील गोपनिय विभागातील पोलीस नाईक अनिल महाजन यांनी तक्राराकडे केली. त्यानुसार तक्रारदार यांनी जळगाव येथील लाचलुचपत विभागात जावून तक्रार दिली. तक्रारीची पडताळणी करण्यासाठी आज दुपारी २ वाजता सापळा रचून संशयित आरोपी पोलीस नाईक अनिल महाजन यांनी ५०० रूपये घेतांना रंगेहात पकडले. जळगाव एसीबीचे पोलीस उपअधीक्षक शशीकांत पाटील यांच्या नेतृत्वात पोलीस निरीक्षक संजोग बच्छाव यांच्यासह सहकाऱ्यांनी ही कारवाई केली.
