जळगाव (प्रतिनिधी) जळगाव लोकसभा मतदारसंघातील महायुतीच्या उमेदवार स्मिताताई वाघ यांच्या नावाने मनोज जरांगे-पाटील यांच्या विषयी एक खोटी पोस्ट सोशल मीडियावर व्हायरल होत आहे. ही बाब निदर्शसनास येताच स्मिताताईंनी तीव्र नाराजी केली असून भाजपाकडून गुन्हा दाखल करण्याची प्रक्रिया सुरु करण्यात आली आहे.
एबीपी न्यूज चॅनलचा लोगो व नाव वापरून एक फेक पोस्ट तयार करण्यात आली. त्यात स्मिताताईंना फोटो व नाव देखील वापरुन खोडसाळपणा करत समाजात तेढ निर्माण करण्याचा प्रयत्न करण्यात आला. ‘खासदार झाल्यास मनोज जरांगे पाटील यांच्या अटकेची मागणी करणार’ अशी पोस्ट करुन त्यावर एबीपीमाझा लोगो व स्मिताताईंचा फोटो वापरण्यात आला आहे. हा खोडसाळपणा समोर आल्यानंतर संपूर्ण जिल्ह्यात संतापाची लाट उसळली आहे. मंत्री गिरीश महाजन, स्मिताताई वाघ, भाजपासह संपूर्ण मराठा समाजातर्फे या प्रकाराचा निषेध व्यक्त करण्यात येत आहे.
स्मिताताई म्हणाल्या की, शिवछत्रपतींच्या काळात महिलांना सन्मान मिळत होता. मात्र आता काही विरोधक महिलांच्या नावाने असे प्रकार करुन महिलांचा अपमान करत आहेत. मराठा समाजाबद्दल अशी आक्षेपार्ह करुन समाजात तेढ निर्माण करण्याचा हा प्रयत्न आहे. मनोजदादा जरांगे यांनाही ही बातमी कळाल्यास ते देखील अशा वृत्तीचा निषेधच करतील. मात्र, माझ्या विरोधात षडयंत्र रचून बदनामी करण्याचा प्रयत्न करणारच्यां विरोधात आम्ही कायदेशीर कारवाई करणार आहोतच, असे स्मिताताई यांनी स्पष्ट केले.
गिरीश महाजन म्हणाले की, विरोधकांच्या पायाखालची वाळू सरकली आहे. त्यांना त्यांचा पराभव समोर दिसू लागला आहे. यामुळे समाजांमध्ये तेढ निर्माण करुन स्वत:ची राजकीय पोळी भाजण्याचा प्रयत्न त्यांच्याकडून होत आहे. मात्र त्यांना सुज्ञ मतदार त्यांना त्यांची जागा दाखविल्याशिवाय राहणार नाही. मराठा समाज आपच्या पाठीमागे भक्कमपणे उभा आहे. हे विरोधकांना पाहिले जात नाही, यामुळेच त्यांनी असे खालच्या दर्जाचे राजकारण केले असल्याचा आरोप ना.महाजन यांनी केला आहे.
