पुणे (वृत्तसंस्था) पुण्यातील प्रसिद्ध पाषाणकर उद्योग समूहाचे प्रमुख गौतम पाषाणकर हे बेपत्ता झाल्यानंतर त्यांची सुसाईड नोट सापडल्यामुळे शहरातील उद्योजक क्षेत्रात एकच खळबळ उडाली आहे. पाषाणकर यांनी व्यवसायातील आर्थिक नुकसानामुळे आत्महत्या करत असल्याचे म्हटले आहे. दरम्यान, पोलिसांनी सीसीटीव्ही कॅमेऱ्याच्या सहाय्याने पाषाणकरांचा शोध सुरु केला आहे.
गौतम पाषाणकर हे बुधवारी नेहमीप्रमाणे ऑफिसच्या कामानिमित्त बाहेर पडले होते. पाषाणकर हे लोणी काळभोर येथील गॅस एजन्सीच्या ऑफिसमध्ये गेले. तेथून ते शिवाजीनगर येथील ऑफिसमध्ये आल्यावर एक बंद लिफाफा चालकाला घरी देण्यास सांगितला. चालक लिफाफा देण्यासाठी घरी गेल्यानंतर कुटुंबीयांनी लागलीच पोलिसात धाव घेतली. मागील काही दिवसापासुन व्यवसायात झालेल्या नुकसानामुळे आत्महत्येचे पाऊल उचलत असल्याचे पाषाणकर यांनी सुसाईड नोटमध्ये म्हटले आहे. यानंतर पोलिसांनी तपासाचा वेग वाढवला असून विद्यापीठ परिसरातील सीसीटीव्हीच्या माध्यमातुन शोध घेत आहे. कारण पाषाणकर ऑफिसमधून बाहेर पडल्यानंतर ते सावित्रीबाई फुले पुणे विद्यापीठाच्या दिशेने चालत निघून गेले होते.
