अमळनेर (प्रतिनिधी) शिरपूरकडून येणाऱ्या बसने दुसऱ्या बसला ओव्हरटेक केल्यानंतर समोरून येणाऱ्या दुचाकीला दिलेल्या धडकेत दोन तरुण जागीच ठार झाल्याची घटना शुक्रवारी दुपारी पांझरा नदी पुलाजवळ घडली. महेंद्र शांतीलाल बोरसे (३९, रा.पाडसे ता. अमळनेर) व अरुण उर्फ शंकर नथ्थू साळुंखे (३८, रा. हिंगोणे खुर्द प्र. जळोद ता. अमळनेर) अशी मृत तरुणांची नावे आहेत.
शुक्रवारी दुपारी ३ वाजेच्या सुमारास शिरपूर -अमळनेर ही बस पांझरा नदी पूल ओलांडून अमळनेर हद्दीत आली होती. त्याचवेळी एका हॉटेलजवळ समोरून येणाऱ्या दुचाकीला बसची जोरदार धडक बसली. यात दुचाकीवरील महेंद्र बोरसे व अरुण साळुंखे यांच्या डोक्याला जबर मार लागल्याने ते जागीच ठार झाले. महेंद्र हा अमळनेर येथे भाड्याने राहत होता. मोंढाळे, बहादरपूर (ता. पारोळा) येथे त्याचा दवाखाना होता. त्याच्या पश्चात आई, वडील,भाऊ ,पत्नी व मुलगा असा परिवार आहे. अरुण हा बांभोरी (ता. धरणगाव) येथे वैद्यकीय व्यवसाय करीत होता. याबाबत बसचालकाविरुद्ध मारवड पोलीस ठाण्यात गुन्हा दाखल करण्यात आला आहे.
