एरंडोल (प्रतिनिधी) शिर्डीहून मुक्ताईनगरला परतणाऱ्या कुटुंबाच्या वाहनाचा भीषण अपघात झाला आहे. या अपघातात पत्नीचा जागीच मृत्यू झाला असून, पती आणि तीन मुले गंभीर जखमी झाली आहेत. ही घटना एरंडोल ते धरणगाव दरम्यान पिंपळकोठा गावाजवळ घडली. मृतदेह एरंडोल ग्रामीण रुग्णालयात आणला गेला असून, जखमींवर उपचार सुरू आहेत. यासंदर्भात एरंडोल पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, मुक्ताईनगर येथील शिक्षक राजेश वासुदेव पाटील (वय 46) हे त्यांच्या पत्नी रुपाली पाटील (वय 40) आणि तीन मुलांसह शिर्डीला देवदर्शनासाठी गेले होते. सोमवारी 24 फेब्रुवारीच्या मध्यरात्री 12.30 वाजता, परतत असताना एरंडोल ते जळगाव दरम्यान नॅशनल हायवेवर युपी ढाब्यासमोर अचानक आलेल्या कंटेनरने त्यांची मारुती स्विफ्ट कार (MH-19-CQ-7009) धडकली. कंटेनर क्रमांक (WB-23-F9472) रस्त्यावर अचानक येवून पाटील यांची कार त्याला मागून धडकली. धडकेनंतर कार रस्त्याच्या डिव्हायडरवर जाऊन आदळली. या भीषण अपघातात राजेश पाटील, त्यांची पत्नी रुपाली पाटील आणि तीन मुले—खुशी, स्वरा आणि गुरु हे सर्व जण गंभीर जखमी झाले.
अपघातानंतर रस्त्यावरून जाणाऱ्या प्रवाशांनी तात्काळ मदतीचा हात पुढे केला. रुग्णवाहिकेद्वारे जखमींना एरंडोल येथील ग्रामीण रुग्णालयात दाखल करण्यात आले. मात्र, उपचारादरम्यान डॉक्टरांनी रुपाली पाटील यांना मृत घोषित केले. त्याचवेळी राजेश पाटील आणि तीन मुलांना—खुशी, स्वरा आणि गुरु—यांना उपचारासाठी एरंडोल येथील खाजगी रुग्णालयात दाखल करण्यात आले. या घटनेनंतर राजेश पाटील यांनी एरंडोल पोलीस ठाण्यात फिर्याद दाखल केली आहे. त्यांनी कंटेनर चालकाविरोधात योग्य ती कायदेशीर कारवाई करण्यात यावी, अशी मागणी केली आहे.
