पारोळा (प्रतिनिधी) नंदुरबार जिल्ह्यातील तालुक्याच्या सोनखांब गावाजवळ गुरुवारी रात्री १२ वाजेच्या सुमारास धुळ्याहून गुजरातच्या दिशेने जाणारा आयशर ट्रक अंधारात मातीच्या ढिगाऱ्यावर आदळून उलटला. या अपघातात तालुक्यातील मंगरुळ येथील चालकाचा जागीच मृत्यू झाल्याने गावात शोककळा पसरली असून या अपघातात अन्य एक जण जखमी झाला आहे.
पारोळा तालुक्यातील मंगरुळ येथील चालक राजेंद्र दत्तू पाटील (वय २५) हे ट्रकमध्ये चोपडा नवापूर तालुक्यातील वेले येथून टरबूज भरून सुरतकडे जात होते. नवापूर तालुक्यातील सोनखांब जवळ हा ट्रक अंधारात मातीच्या ढिगाऱ्यावर आदळून उलटला. यात ट्रक चालक राजेंद्र पाटील यांचा मृत्यू झाला. तर चोपडा तालुक्यातील वैले येथील शेतकरी रघुनाथ पाटील हे जखमी झाले. यामुळे ट्रकमध्ये भरलेले टरबूज हे महामार्गावर अस्ताव्यस्त विखुरलेले होते. यामुळे शेतकऱ्याचे ही मोठे नुकसान झाले. मृत राजेंद्र पाटील यांचे पश्चात आई व दोन बहिणी असा परिवार आहे. दरम्यान, महामार्गाच्या ठेकेदाराचा गलथान कारभारामुळेच चालकाचा बळी गेल्याचे स्थानिक नागरिकांनी आरोप केला आहे.
