मुंबई (वृत्तसंस्था) छोट्या पडद्यावरील प्रसिद्ध अभिनेत्री श्वेता तिवारीच्या एका वक्तव्यावरुन सध्या मोठा वाद रंगला आहे. श्वेता तिवारीने अंतर्वस्त्रासंबंधी बोलताना देवाचा उल्लेख केल्याने हा वाद सुरु झाला आहे. दरम्यान याप्रकरणी श्वेता तिवारीच्या अडचणीत आणखी वाढ झालेलं दिसून येत आहे. श्वेता तिवारीने केलेल्या या वक्तव्याचा निषेध करत अभिनेत्रीवर एफआयआर दाखल केली आहे.
अभिनेत्री श्वेता तिवारीवर धार्मिक भावना दुखावण्याचा आरोप करत कलम 295A अंतर्गत एफआयआर दाखल करण्यात आली आहे. श्वेता तिवारीचं हे वक्तव्य समोर येताच हिंदू संघटना अभिनेत्रीचा कडाडून विरोध करत आहेत. इतकंच नव्हे तर हे प्रकरण मध्य प्रदेशच्या गृहमंत्र्यांपर्यंत पोहोचलं आहे. श्वेता तिवारी आणि या वेबसीरीजच्या दिग्दर्शकावर गुन्हा दाखल करण्याची मागणी गृहमंत्र्यांकडे केली जात आहे. श्वेता तिवारीने सार्वजनिक पद्धतीने या प्रकरणावर माफी मागावी तिने जर माफी नाही मागितली तर या वेबसीरीजचं शूटिंग भोपाळमध्ये होऊ देणार नाही असा इशारा हिंदू संघटनांनी दिला आहे.
अभिनेत्री श्वेता तिवारी नुकतंच आपल्या आगामी ‘शो स्टॉपर-मीट द ब्रा फिटर’ या वेबसीरीजच्या प्रमोशनसाठी भोपाळला गेली होती. या कार्यक्रमादरम्यान हा सर्व प्रकार घडला. यावेळी श्वेता तिवारीने ‘माझ्या ब्रा चं माप देवच घेत असेल..’ असं खळबळजनक वक्तव्य केलं होतं. अभिनेत्रीचं हे वक्तव्य समोर येताच सर्व स्तरातून तिच्यावर टीका होत आहे. इतकंच नव्हे तर श्वेताच्या या वक्तव्यावर अनेक राजकीय नेत्यांनी सुद्धा आक्षेप घेतला आहे.
