जम्मू/श्रीनगर (वृत्तसंस्था) जम्मू जिल्ह्याच्या नगरोटा भागात आज (गुरुवार) पहाटे झालेल्या चकमकीच ४ दहशतवादी ठार झाले आहेत. हे अभियान अजूनही सुरूच आहे. दहशतवादी हे एका ट्रकमधून जवानांवर गोळीबार करत होते. उत्तरादाखल सुरक्षादलांच्या जवानांनी हा ट्रकच उडवून दिला.
दहशतवादी अंधाराचा फायदा उठवत जाण्याच्या तयारीत असल्याची माहिती मिळाल्यानंतर सुरक्षादलांनी बन टोल प्लाझाजवळ एक नाका उभारला होता. पहाटे ५ वाजण्याच्या सुमारास गाड्यांच्या तपासणीदरम्यान दहशतवाद्यांच्या एका गटाने सुरक्षादलावर गोळीबार करणे सुरू केले. यानंतर चकमकच सुरू झाली. हे दहशतवादी एका ट्रकमध्ये बसले होते. ट्रकमधूनच ते जवानांवर गोळीबार करत होते. उत्तरादाखल सुरक्षादलांच्या जवानांनी हा ट्रकच उडवून दिला. यानंतर काही दहशतवादी जवळच्या जंगलात पळून जाण्याचा प्रयत्न करू लागले. या दहशतवाद्यांकडून मोठ्या प्रमाणात शस्त्रे आणि दारुगोळा हस्तगत करण्यात आला. आतापर्यंत ४ दहशतवाद्यांना ठार करण्यात आले आहे.
