पुणे (वृत्तसंस्था) ओळखीचा गैरफायदा घेऊन जबरदस्तीने शारीरीक संबंध करीत असलेला व्हिडिओ काढून तो व्हायरल करण्याची धमकी देऊन महिलेवर बलात्कार केल्याचा प्रकार समोर आला आहे. हा प्रकार २३ जानेवारी २०१९ ते ८ एप्रिल २०२१ दरम्यान कोंढवा तसेच वडगाव शेरी येथील सैनिकवाडीतील आरोपीच्या घरी घडला आहे. दरम्यान, संशयित आरोपी भुसावळशी संबंधित असल्याचे समोर येत आहे.
याप्रकरणी कोंढवा पोलिसांनी ऑलविन एडवर्ड डेव्हिड (वय 35, रा. सैनिकवाडी, वडगाव शेरी) याच्याविरुद्ध गुन्हा दाखल केला आहे. याप्रकरणी कोंढवा येथे राहणाऱ्या एका महिलेने फिर्याद दिली आहे. पोलिसांनी दिलेल्या माहितीनुसार, फिर्यादी आणि आरोपी हे एकमेकांचे ओळखीचे आहेत. फिर्यादी या आरोपीच्या घरी गेल्या असताना दोघांमध्ये शारिरीक संबंध आले. त्यावेळी सेक्स करताना नकळत आरोपीने व्हिडीओ काढले. दोघे सेक्स करतानाचे व्हिडिओ व्हायरल करण्याची धमकी देऊन त्याने वारंवार पिडीतेवर बलात्कार केला. फिर्यादीला शिवीगाळ करून मारहाण केली. बदनामीच्या भितीने फिर्यादीने ही बाब कोणाला सांगितली नाही. मात्र, त्याच्या अत्याचाराला कंटाळून शेवटी या महिलेने पोलिसांकडे धाव घेऊन तक्रार दिली. पोलीस उपनिरीक्षक जाधव तपास करीत आहेत. दरम्यान, यातील संशयित आरोपी हा काही वर्षे आधी भुसावळ येथे राहत होता. त्यानंतर तो कामानिमित्त पुण्याला स्थलांतरित झाल्याची माहिती समोर येत आहे.
