भुसावळ (प्रतिनिधी) भुसावळचे माजी आमदार संतोष चौधरी हे काँग्रेसच्या वाटेवर असल्याचे वृत्त आहे. लवकरच ते आपल्या समर्थकांसह काँग्रेस पक्षात प्रवेश करणार असल्याची चर्चा आहे.
संतोष चौधरी यांना मध्यंतरी शरद पवार गटाच्या माध्यमातून लोकसभेसाठी उमेदवारी मागितली. परंतु, त्यांच्या ऐवजी श्रीराम पाटील यांना तिकिट मिळाल्यानंतर ते नाराज झाले होते. येथूनच ते वेगळा मार्ग निवडणार असल्याची चर्चा झाली होती. या पार्श्वभूमीवर संतोष चौधरी आणि त्यांचे समर्थक हे राष्ट्रीय काँग्रेस पक्षात सहभागी होण्याची चाचपणी करत असल्याची माहिती समोर आली आहे. त्यांनी पक्षाचे प्रदेशाध्यक्ष नाना पटोले यांची भेट घेतली असून यातच चौधरींच्या प्रवेशाची चर्चा झाल्याची खात्रीलायक माहिती समोर आली आहे. यामुळे आता भुसावळ शहर आणि विधानसभा मतदार संघातील राजकारण बदलणार असल्याचे राजकीय विश्लेषकांचा अंदाज आहे.
माजी आमदार तथा माजी नगराध्यक्ष तथा राष्ट्रवादीच्या शरदचंद्र पवार पक्षाचे नेते संतोष चौधरी यांनी आपल्या कारकिर्दीची सुरूवात शिवसैनिक म्हणून केली होती. शिवसेनेच्या माध्यमातूनच ते नगरसेवक, उपनगराध्यक्ष आणि नगराध्यक्षपदी विराजमान झाले होते. महात्वाकांक्षी संतोष चौधरी यांनी शिवसेनेत आपल्याला भविष्य नसल्याचे हेरून १९९९ साली राष्ट्रवादीत प्रवेश केला. येथून त्यांनी शहरासह मतदार संघाच्या राजकारणात मोठी भूमिका पार पाडली. २००४च्या विधानसभा निवडणुकीत त्यांना यश मिळाल्यानंतर हा मतदारसंघ राखीव झाला. यानंतरही ते पालिकेच्या माध्यमातून शहराच्या राजकारणात सक्रिय होते. दरम्यान, २०१६ साली त्यांनी आपले पुत्र सचिन चौधरी यांना लोकनियुक्त नगराध्यक्षपदाच्या निवडणुकीत उतरवले. परंतु, त्यांना पराभवाचा सामना करावा लागला. यानंतर गत ८ वर्षात त्यांना कोणतेही पद मिळाले नाही.
