नांदेड (वृत्तसंस्था) चार दिवसानं लग्न, मित्र, नातेवाईकांना मोठ्या आनंदाने पत्रिका वाटल्या, घरात पाहुणे आणि लग्नाची लगबग सुरु असतानाच अघटीत घडलं आणि लग्नघरात शोककळ पसरली. ज्या घरात नवरदेवासह कुटुंबियांच्या आनंदाला उधाण आले होते, त्याच घरावर आता शोककळा पसरली आहे. एकीकडे लगीनघाई सुरु असतानाच ऑटो अपघात होऊन नवरदेव ठार झाला आहे.
उमरी तालुक्यातील बोथी येथील नामदेव रामलू लखमोड २२ याचा विवाह गोळेगाव येथील एका मुलीशी दि. ९ जुलै रोजी बोथी या ठिकाणी होणार होता. लग्नाच्या सर्व पत्रिका वाटून झाल्या. मंगळवार हा उमरी शहराचा आठवडी बाजार असल्याने बाजाराच्या दिवशी नवरदेव नामदेव हा आपल्या कुटुंबासह गावातील एक ऑटोरिक्षा घेऊन उमरीला आला होता.
शुभ विवाहासाठी लागणारे सर्व साहित्य खरेदी करून सायंकाळच्या सुमारास कुटुंबातील सदस्य नवरदेवासह बोथी गावाकडे जात होते. तेवढ्यात रेनेवाड यांच्या धाब्याजवळील दुभाजकावर ऑटो आदळला आणि नवरदेवाचा हात निसटून तो दुभाजकावर आपटला. त्याच्या डोक्याला गंभीर दुखापत झाल्याने नामदेव लखमोड यांचा जागीच मृत्यू झाला. या अपघातामुळे वधू वराकडील कुटुंबावर दुःखाचा डोंगर कोसळला आहे. हळद लागण्यापूर्वीच नवरदेवावर काळाने घाला घातल्याने हळहळ व्यक्त केली जात आहे. याबाबतचे वृत्त आज एका दैनिकाने प्रसिद्ध केले आहे.
