अमळनेर (प्रतिनिधी) मोगरा देवीची शक्ती अंगात असल्याचे भासवून मुलाचे लग्न जमवून देईल, पैसे दुप्पट करून देईल आणि सोन्याचे दागिने काढून देण्याचे आमिष दाखवत एका महिलेने १८ लाखात फसवल्याची घटना शहरातील बंगाली फाईल भागात फेब्रुवारी ते जून महिन्यादरम्यान घडली. या महिलेविरुद्ध जादूटोणा कायद्यानुसार गुन्हा दाखल करण्यात आला आहे.
बंगाली फाईलमधील रामवाडी येथील राजेंद्र नारायण माळी याने या संदर्भात फिर्याद दिली आहे. त्यात म्हटले आहे की, १२ फेब्रुवारीला त्यांची आई भटाबाई माळी या महादेव मंदिरात पूजेसाठी गेल्या होत्या. तेथे त्यांना मोगरा देवी अंगात येत असलेली मंगलाबाई बापू पवार भेटली. त्यांनी भटाबाईला सांगितले की, तुझ्या घरी लक्ष्मी नाराज आहे, त्यामुळे तुझ्या मुलाचे लग्न जमत नाही. लक्ष्मीला प्रसन्न करण्यासाठी पूजेसाठी २५ हजार रुपये लागतील. भटाबाईने ही गोष्ट घरी सांगितली. त्यानंतर त्यांनी मंगलबाईला पूजा करण्यास सांगितले. त्याच दिवशी रात्री ११ वाजता मंगलाबाई त्यांच्या घरी गेली व तुमच्या घरामागे कानबाईची मूर्ती व सोन्याच्या घागरी आहेत, असे
सांगितले. तर ते काढण्यासाठी साडेचार लाख रुपये द्या. त्यामुळे नारायण माळी यांनी दुसऱ्या दिवशी बँकेतून साडेचार लाख रुपये काढून दिले. हे पैसे धान्याच्या कोठीत ठेवावे लागतील, असे सांगत त्या बेडरूममध्ये गेल्यात. तर घरातील सर्वांना बाहेर काढून दरवाजा आतून लावून घेतला. पुन्हा चार दिवसांनी तिने घरामागून तांब्याची घागर काढून आणली व तिच्यात सोन्याचे दागिने आहेत, असे सांगून साडेतीन लाखांची मागणी केली. पुन्हा तीने बेडरूममध्ये जाऊन साडे तीन लाख धान्याच्या कोठीत ठेवले. पुन्हा त्यांनी तिसरी घागर काढून अडीच लाख रुपये मागितले, नंतर चवथी घागर काढून पुन्हा अडीच लाख रुपये मागितले. प्रत्येकवेळी तिने पैसे कोठीत ठेवण्याच्या नावे असे १४ लाख रुपये मागून घेतले. तर पुन्हा मार्च महिन्यात तिने टोपलीतून देवीचा मुखवटा बाहेर काढत अडीच लाख देवीच्या मुखवट्याजवळ ठेवायला लावले. तेही पैसे तीने घरात एकटी जाऊन धान्याच्या कोठीत ठेवल्याचे सांगितले. मात्र, ती पैसे कोठे ठेवत होती, हे घरच्यांना ही माहित नव्हते. तर जून महिन्यात पुन्हा सोन्याच्या घागरी आणि
सोन्याची देवीची मूर्ती काढण्यासाठी पूजेच्या साहित्यासाठी दीड लाख रुपये मागितले. घरमालकाचे पैसे संपले, त्यांनी आम्हाला सोने, दुप्पट पैसे नको म्हणून आमचे पैसे कोठीतून काढून द्या, असे सांगितल. त्यावर मंगलाबाईने तुमच्या घरात पाच फणी नाग आहे, तुम्ही घरात जाऊ नका म्हणून मनाई केली. त्यांनतर मंगलाबाईने माझ्या जादूने व मोगरा मातेच्या कृपेने तुमच्या घरात पैशाचा ढीग लागला असून तो थांबवण्यासाठी पुन्हा ८० हजारांची मागणी केली. पुन्हा त्या ८० हजार घेऊन बेडरूममध्ये गेल्यात. त्याचवेळी दीपक माळी याने आरशातून ती महिला ८० हजार रुपये स्वतःच्या साडीत लपवत असल्याचे पाहिले. यानंतर माळी कुटुंबाने धान्याच्या कोठीत ठेवलेले पैसे पाहिले, परंतु, तेथे काहिच आढळले नाही. फसवणूक झाल्याचे लखात येताच राजेंद्र माळी याने दिलेल्या फिर्यादीवरून मंगलाबाई बापू पवार यांच्याविरुद्ध विविध कलमान्वये गुन्हा दाखल करण्यात आला आहे. तपास पो.उ.नि. समाधान गायकवाड करत आहेत.
