धरणगाव (प्रतिनिधी) येथील दाखल गुन्ह्यातील फरार २१ वर्षीय आरोपीला अटक करण्यास धरणगाव पोलिसांना यश मिळाले आहे. पेट्रोलिंग करत असताना हा आरोपी पोलिसांच्या जाळ्यात फसला.
याबाबत मिळालेली माहिती अशी की, अमळनेर येथील पोलीस स्टेशन भाग ५ रजिस्टर नंबर ३३४/२०२० भादवि कलम ३६३ अंतर्गत दाखल असलेल्या गंभीर गुन्ह्यातील फरार आरोपी गणेश विक्रम सोनवणे (वय २१ रा. हनुमंतखेड, धरणगाव) याला गोपनीय माहितीच्या आधारावर राहत्या घरून अटक करण्यात आली आहे. धरणगाव पोलीस निरीक्षक शंकर शिराळे यांच्या मार्गदर्शनानुसार पो.हे.कॉ राजेंद्र नामदेव कोळी, पो.ना. पराग पवार या पथकाने ही कारवाई केली आहे. सदर आरोपीला पुढील तपासाकामी वैद्यकीय तपासणीअंती अंमळनेर पोलिसांच्या ताब्यात देण्यात आले आहे. गंभीर गुन्ह्यातील फरार आरोपीला अटक करण्यात आल्यामुळे पोलिसांच्या या कर्तृत्वाचे सर्व स्तरावर कौतुक केले जात आहे.
