चोपडा (प्रतिनिधी) तालुक्यातील अनेर डॅम ते गणपुरच्या दरम्यान मराठे गावाकडे जाणाऱ्या रस्त्यावर एका तस्करास मोटरसायकलवर गांजा घेऊन येत असताना चोपडा ग्रामीण पोलिसांनी रंगेहात पकडले आहे. कैलास अमरसिंग बारेला (वय 46 रा. शिरवेल, महादेव मध्य प्रदेश, हल्ली मुक्काम कुंड्या पाणी ता. चोपडा), असे संशयित आरोपीचे नाव आहे.
पोलिसांनी पकडल्यावर कैलास बारेला याची झडती घेतली असता त्याच्याकडून सात किलो २०० ग्रॅम वजनाचा गांजा मिळून आला. संशयित दुचाकीस्वार आरोपीस अटक करण्यात आली असून ६७ हजार रु किमतीचा दुचाकीसह ऐवज जप्त करण्यात आला आहे. अधिक तपास चोपडा ग्रामीण पोलीस स्टेशनच्या पोलिस निरीक्षक कावेरी कमलाकर यांच्या मार्गदर्शनाने सहाय्यक पोलीस निरीक्षक शेषराव नितनवरे हे करीत आहेत.
