पुणे (वृतसंस्था) गेल्या काही दिवसांपासून पोलिसांकडून गौतम पाषाणकर यांचा कसून शोध घेतला जात आहे. सूत्रांच्या माहितीनुसार, याप्रकरणातील महत्त्वाचे धागेदोरे पोलिसांच्या हाती लागले आहेत. त्यामुळे लवकरच या प्रकरणाचा उलगडा होण्याची शक्यता वर्तविली जात आहे.
पुण्याचे पोलीस आयुक्त अमिताभ गुप्ता यांनी यासंदर्भात माहिती दिली. पाषाणकर यांना कोल्हापूरपर्यंत नेण्यात आल्याची बाब प्राथमिक तपासात निदर्शनास आली आहे. पाषणकरांच्या शोधासाठी पुणे पोलिसांचे पथक शहर आणि जिल्ह्याबाहेरही पाठवण्यात आले आहे. गेल्या काही दिवसांपासून बेपत्ता उद्योजक गौतम पाषाणकर प्रकरणाच्या तपासाला आता वेग येण्याची शक्यता आहे. गौतम पाषाणकर हे ऑटोमोबाईल क्षेत्रातील मोठं नाव आहे. गेल्या २१ दिवसांपासून ते बेपत्ता आहेत. सावित्रीबाई फुले पुणे विद्यापीठ चौकातून गौतम पाषाणकर बेपत्ता झाले होते. पोलीस सध्या जागोजागी पाषाणकर यांचा शोध घेत असून त्यांचे नातेवाईक आणि कार चालकाची चौकशी करत आहेत. पाषाणकर कोणालाही दिल्यास त्यांच्या कुटुंबाला ९८२२४७४७४७ या मोबाईल क्रमांकावर किंवा शिवाजीनगर पोलिस ठाण्याला ०२०-२५५३६२६३ या क्रमांकावर कळवण्याचे आवाहन करण्यात आले आहे. गौतम पाषाणकर यांनी लिहिलेली सुसाईड नोट सापडली आहे. त्यांनी आपल्या ड्रायव्हरकडे बंद लिफाफा दिला होता. घरी गेल्यानंतर त्यांच्या पत्नीने उघडून बघितल्यावर त्यात सुसाईड नोट होती. गेल्या काही दिवसांपासून व्यवसायात मोठ्या प्रमाणात नुकसान झाल्याचा उल्लेख या नोटमध्ये करण्यात आला होता.
