जळगाव (प्रतिनिधी) पुणे येथून जळगावात येणाऱ्या वाहनातून पाच कोटी ५९ लाख ६१ हजार १५ रुपयांचे सोने-चांदी जप्त करण्याची कारवाई स्थानिक गुन्हे शाखा व एमआयडीसी पोलिसांनी शुक्रवारी रात्री रेमंड चौकात केली. सदर सोने-चांदी हे जळगाव शहरातील एका सराफ व्यावसायीकासह अन्य तिघांचे असल्याचे सुत्रांकडून सांगण्यात येत आहे.
विधानसभा निवडणुकीच्या पार्श्वभूमिवर जिल्ह्यात ठिक ठिकाणी वाहनांची तपासणी करण्यात येत आहे. शुक्रवारी जळगाव शहरातील विविध ठिकाणी २३ लाखांहून अधिक रक्कम जप्त करण्यात आली असून रात्री रेमंड चौकात स्थानिक गुन्हे शाखा व एमआयडीसी पोलिस नाकाबंदी करीत असताना पुणे येथून येणारे एक वाहन (क्र. एमएच १२, यूएम ५६२०) अडविले असता त्यात जवळपास चार किलो सोने व ३४ किलो चांदी आढळली.
या विषयी संबंधित चालकाकडे विचारणी केली असता त्याने हे वाहन सोने-चांदी वाहतूक करणाऱ्या एजन्सीचे असल्याचे सांगितले. या विषयी उपविभागीय पोलिस अधिकारी संदीप गावित यांना माहिती देण्यात आली व त्यांच्या उपस्थितीत पंचनामा करण्यात आला.
संबंधित वाहन एमआयडीसी पोलिस ठाण्यात जमा करण्यात आले. जप्त करण्यात आलेल्या मालाची भरारी पथकासमोर पाहणी करून इन कॅमेरा सर्व प्रक्रिया करण्यात आली. त्यानंतर हा साठा कोषागार कार्यालयात नेण्यात आला. हे वाहन पुणे येथून सोने-चांदी घेऊन जळगावात येत होते. जळगावातील एका नामांकीत सुवर्ण व्यावसायिकासह अन्य दोन असे एकूण तीन सुवर्ण व्यावसायिकांचे हे सोने-चांदी असल्याचे सांगण्यात येत आहे.
जप्त केलेल्या मालाचे कागदपत्र वाहन चालकाकडे होते. मात्र त्यात इतर आवश्यक कागदपत्रे नसल्याने हा साठा जप्त करण्यात आला आहे. एमआयडीसी पोलीस ठाण्याचे पोलीस निरीक्षक दत्तात्रय निकम, पोउनि शरद बागल, स्थानिक गुन्हे शाखेचे पोउनि गणेश वाघमारे, नंदलाल पाटील, भगवान पाटील, प्रदीप चवरे, प्रमोद ठाकूर यांच्या पथकाने ही कारवाई केली.
