मुंबई (वृत्तसंस्था) कोरोनावरील आणखी एका लशीला भारत सरकारनं परवानगी दिलीय. ZyCoV-D असं या लशीचं नाव आहे. झायडस कॅडिला कंपनीनं तयार केलेल्या या लशीला आज भारत सरकारच्या ड्रग्ज कंट्रोलर जनरल ऑफ इंडियानं आपत्कालीन वापरासाठी परवानगी दिलीय. विशेष म्हणजे, १२ वर्षांवरील मुलं आणि प्रौढांना ही लस देता येणार आहे.
देशातील आघाडीची औषध निमिर्ती कंपनी झायडस कॅडिलाच्या या लसीला अखेर औषध महानियंत्रक अर्थात डीसीजीआयने आपत्कालीन वापरासाठी मंजुरी दिली आहे. ZyCoV-D लसीने सुरक्षिततेचे सर्व निकष पूर्ण केल्यामुळे डीजीसीआयने हा निर्णय घेतला आहे. ही लस पूर्णपणे स्वदेशी असून डीएनएवर आधरित असणारी जगातील पहिली लस आहे. देशात आणखी एक लस उपलब्ध झाल्यामुळे आता लसीकरणाला गती येण्याची शक्यता आहे.
मागील काही आठवड्यांपासून झायडस कॅडिला कंपीन त्यांच्या ZyCoV-D या डीएनएवर आधारीत असलेल्या लसीला आपत्कालीन वापराची परवानगी मिळावी यासाठी प्रयत्न करत होती. त्यासाठी कंपनीने डीसीजीआयकडे रितसर अर्जसुद्धा केला होता. तोच अर्ज मंजूर करुन डीसीजीआयने ZyCoV-D या लसीच्या आपत्कालीन वापराला मंजुरी दिली आहे. दिलेल्या मंजुरीनुसार ZyCoV-D ही लस आता १२ वर्षांपेक्षा जास्त वय असलेल्या मुलांना तसेच १८ वर्षांपेक्षा जास्त वय असलेल्या सर्व नागरिकांना देता येईल.
झायडस कॅडिलानं डीएनए आधारित कोरोना लसीची निर्मिती केली आहे. डीएनएवर आधारित असणारी कोरोनावरील जगातील ही पहिली लस आहे. या लसीमध्ये कोरोना विषाणूच्या डीएनएच्या जेनेटिक कोडचा वापर करण्यात आला आहे. यामुळे लस घेतल्यानंतर व्यक्तीची प्रतिकारशक्ती वाढण्यास मदत होईल.
