चोपडा (प्रतिनिधी) गणपती बाप्पा मोरया पुढच्या वर्षी लवकर या, अशी आर्त साद घालत जड अंत:करणाने लाखो गणेशक्तांनी आपल्या लाडक्या गणपती बाप्पाला नुकताच निरोप दिला. यावेळी रोटरी क्लब ऑफ चोपडा आणि शारदा मॅथ क्लासेसकडून नाश्ता व पाणी बॉटलचे वितरण केले.
महाराष्ट्रात सुरू झालेला श्री गणेशोत्सव आता अवघ्या जगाचा झाला आहे. गणपती बाप्पाचे आगमन म्हणजे उत्साहाला उधाण आणि तसंच बाप्पाला निरोपही तेवढ्याच जोशात दिला जातो. या जोशात रंगाचा भंग होऊ नये म्हणून पोलीस, होमगार्ड आणि सोबत एसआरपी व इतर सर्व बंधू-भगिनींचा खडा पहारा साऱ्या चोपडा शहरात असतो.
स्वतःच्या गरजा, दुखणं खूपणं, घरचा गणपती सारे बाजूला सारून सदरक्षणाय खलनिग्रणायसाठी कर्तव्य बजावणारे हेच सारे बांधव सामान्य जनतेसाठी खरे विघ्नहर्ता असतात. त्यांच्या कर्तव्याच्या प्रती कृतज्ञता व्यक्त करण्यासाठी रोटरी क्लब ऑफ चोपडा आणि शारदा मॅथ क्लासेस परिवार, चोपडा यांच्या संयुक्त विद्यमाने 500 पॅकेट शिरा आणि पोहेचा स्वादिष्ट नाश्ता व सोबत पाण्याच्या बॉटलचे वितरण करण्यात आले.
शारदा मॅथ क्लासेस परिवाराच्या विद्यार्थ्यांनी सर्व पॅकिंग आणि वितरणाची जबाबदारी सांभाळली. यात विद्यार्थिनींचा सहभाग हा उत्स्फूर्त व लाक्षणीय होता. यावेळी चोपडा विभागाचे उपअधीक्षक कृषिकेश रावले आणि चोपडा शहर पोलीस ठाण्याचे एपीआय के.के. पाटील यांनी या उपक्रमाचे विशेष कौतुक केले. चोपडा रोटरी क्लबच्या सर्व सदस्यांचे या उपक्रमासाठी विशेष सहकार्य लाभले.
