पाचोरा (प्रतिनिधी) येथील एका पोलिस कर्मचाऱ्याने आपल्या ‘कस्टडी’तील १२ लाखांच्या रोकडसह ६ लाख ८५ हजाराचे सोन्या-चांदीच्या दागिन्यांवर डल्ला मारल्याची खळबळजनक घटना उघडकीस आली आहे. या प्रकरणी गुन्हा दाखल करण्यात आला असून पो.हे.कॉ. यशवंत भिका घोरसे (५२, रा. पाचोरा), असे संशयित आरोपीचे नाव आहे.
पाचोरा पोलिस ठाण्यात यशवंत घोरसे हा कार्यरत होता. मुद्देमाल कारकून म्हणून त्याच्याकडे जबाबदारी होती. कस्टडीत असलेल्या १०२.९३ ग्रॅम सोन्याचे दागिने, ६.४६४ किलोग्रॅम चांदीचे दागिने व १२ लाख ३७ हजार ५७७ रु. रक्कम घेत संशयित पसार झाला. दरम्यान, यशवंतचा भाऊ सुनील घोरसे याने या मुद्देमालापैकी ७३.६३ ग्रॅम सोन्याचे दागिने, ६.४६४ किग्रॅ चांदीचे दागिने व ६ लाख ८५ हजार रुपये असा मुद्देमाल पोलिसांना परत केला आहे. अद्यापही यशवंत याच्याकडे २९.३० ग्रॅम सोन्याचे दागिने व ५ लाख ५२ हजार ५७७ रुपये घेणे बाकी आहे. पोलिस उपनिरीक्षक योगेश गणगे यांच्या फिर्यादीवरून यशवंतविरुद्ध १३ रोजी फसवणुकीचा गुन्हा दाखल करण्यात आला आहे.
