छत्रपती संभाजी नगर (वृत्तसंस्था) घरातील कचरा रस्त्याच्या कडेला टाकण्यासाठी गेलेल्या सहा वर्षीय चिमुकलीला भरधाव दुचाकीने धडक दिल्याने तिचा जागीच मृत्यू झाला. हा अपघात शनिवारी रात्री दौलताबाद स्थानकावरील लाडजी मस्जिदसमोर घडला. जैनब शेख असे मृत चिमुकलीचे नाव आहे. तर या अपघातात रईसा शेख अब्दुल कादर (५०, रा. दौलताबाद) ही पादचारी व दुचाकीवरील निखिल राजाराम बोडखे (२४), वैभव वैजिनाथ बोडखे (२३, रा. नद्राबाद ता. खुलताबाद) हे तिघे गंभीर जखमी झाले आहेत.
निखिल व वैभव बोडखे हे दुचाकीने रात्री ११:३० वाजेच्या सुमारास (एमएच २०. जीएफ २७०९) संभाजीनगरकडून नंद्राबादकडे सुसाट वेगाने जात होते. त्याचवेळी दौलताबाद येथील लाडजी मस्जीदसमोर घरातील कचरा रस्त्याच्या कडेला टाकण्यासाठी आलेल्या रईसा शेख अब्दुल कादर व त्यांच्यासोबत सहा वर्षीय जैनब जुनेद शेख हिला जोरदार धडक दिली. या धडकेत जैनब लांब फेकली गेली. यात तिच्या डोक्याला जबर मार लागल्यानंतर नाकातून रक्त आले, तर रईसा या खाली पडल्या.
अपघातानंतर दुचाकी समोरून येणाऱ्या कारला (एमएच २०. एफवाय ९१८९) जाऊन धडकली. धडक बसताच कारमधील एअरबॅग बाहेर निघाल्याने आतील प्रवासी सुदैवाने बचावले. या अपघात कारचेही मोठे नुकसान झाले. अपघातानंतर परिसरात मोठा आवाज झाल्याने परिसरातील नागरिकांनी घटनास्थळाकडे धाव घेतली. त्यानंतर नागरिकांनी जखमींना तात्काळ खाजगी वाहनाने घाटीत पाठवले. दरम्यान, मृत जैनफ ही एकुलती एक असल्याने तिच्या मृत्यूने परिसरातील लोकांनी हळहळ व्यक्त केली.
