एरंडोल (प्रतिनिधी) अतिशय संघर्षशील अनुभवांवर लिहलेले ताई मी कलेक्टर व्हयनू हे पुस्तक तुफान गाजले तसेच तरूणाईनचे आयकॉन म्हणून ओळखले जाणारे मूळचे एरंडोल तालुक्यातील रहिवासी, सध्या ओडिशा राज्यातील आयएएस कॅडरचे अधिकारी राजेश पाटील यांची प्रतिनियुक्तीवर महाराष्ट्रात बदली करण्यात आली असून ते पिंपरी-चिंचवड महापालिकेचे आयुक्त म्हणून पदभार सांभाळणार आहेत.
राजेश पाटील यांनी ओडिशा राज्याचे कॅडर निवडले असल्यामुळे ते आजवर त्याच राज्यात विविध पदांवर कार्यरत होते. अलीकडच्या काळात ते महाराष्ट्रात प्रतिनियुक्तीवर येणार असल्याची चर्चा सुरू होती. या अनुषंगाने आज झालेल्या आयएएस अधिकाऱ्यांच्या बदलीत त्यांची महाराष्ट्रात प्रतिनियुक्तीवर बदली करण्यात आली आहे. ते पिंपरी-चिंचवड महापालिकेच्या आयुक्तपदाची धुरा सांभाळणार आहेत. या पार्श्वभूमिवर आता ते पिंपरी-चिंचवड सारख्या अतिशय महत्वाच्या महापालिकेच्या आयुक्तपदाचा कार्यभार सांभाळणार असल्याची बाब लक्षणीय मानली जात आहे.
आयएएस राजेश पाटील यांची जीवनकथा तरूणांसाठी प्रेरणादायी
राजेश प्रभाकर पाटील यांची जीवनकथा ही लक्षावधी तरूणांसाठी प्रेरणादायी बनली आहे. त्यांचे पालक हे शेतमजूर होते. तर शिकत असतांना राजेश पाटलांना पाव व भाजी विक्रीचे काम करावे लागले. जिल्हा परिषदेच्या शाळेत शिकल्यानंतर त्यांनी जिद्दीने पुढील शिक्षण पूर्ण केले. २००५ सालच्या युपीएससी परिक्षेत त्यांनी यश संपादन करून भारतीय प्रशासनीक सेवा अर्थात आयएएसमध्ये प्रवेश केला. आपल्या अतिशय संघर्षशील अनुभवांवर त्यांनी लिहलेले ताई मी कलेक्टर व्हयनू हे पुस्तक तुफान गाजले असून त्यांच्या व्याख्यानांनी तरूणाईला दिशा देण्याचे काम केले आहे. ते तरूणाईनचे आयकॉन म्हणून ओळखले जातात.
