कासोदा, ता. एरंडोल (प्रतिनिधी) – एरंडोल तालुक्यातील सोनबर्डी येथील एक महिला कासोदा येथे आल्यानंतर त्यांची ४७हजार रुपये असलेली पिशवी चोरट्यांनी चालाखीने लंपास केली होती. या प्रकरणी कासोदा पोलिसांच्या पथकाने सीसीटीव्ही, गोपनीय माहितीच्या आधारे मध्य प्रदेशातील आरोपींना ताब्यात घेत ऐवज जप्त केला. तर ही रक्कम त्या महिलेला परत केली आहे.
कासोदा येथे २१ जुलैला आठवडे बाजाराच्या दिवशी सकाळी १० वाजेच्या सुमारास सोनबर्डी येथील महिला आशाबाई बाबूलाल देवरे (वय ५०) या सेंट्रल बँकेत पैसे काढण्यासाठी आल्या होत्या. त्या पैसे काढून बँकेतून आठवडे बाजाराच्या दिवशी पंखा दुरुस्तीसाठी जात होत्या. रस्त्यात अज्ञात व्यक्तींनी त्यांचे लक्ष विचलित करून त्यांच्या साडीवर घाण टाकून त्यांचे लक्ष विचलित केले. त्यानंतर त्यांनी पैशांची पिशवी एका दुकानाच्या बाकड्यावर ठेवली. त्याचवेळी अज्ञात चोरट्यांनी आशाबाई देवरे यांच्या नकळत ती पिशवी चोरुन पोबारा केला. या पिशवीत ४७ हजार ६३० रुपये होते, ते चोरट्यांनी चोरून नेलेत. याबाबत आशाबाई देवरे यांनी कासोदा पोलीस ठाण्यात फिर्याद दाखल केली होती. या गुन्ह्याच्या तपासादरम्यान सीसीटीव्ही फुटेज व गोपनीय माहितीच्या आधारे कासोदा पोलीस ठाण्याचे पोलीस पथक स.पो.नि. श्रीकांत पाटील यांच्या मार्गदर्शनाखाली तपास अधिकारी हे. कॉ. राकेश खोंडे, हे.कॉ. नंदलाल परदेशी, पो.कॉ. दीपक देसले, पो.कॉ. स्वप्नील परदेशी, पाचोरा येथील पो.कॉ. हरीश परदेशी यांना मध्य प्रदेशमध्ये रवाना करण्यात आले. त्यांनी मध्य प्रदेशात जाऊन संशयित आरोपी निखिल सिसोदिया व आलोक सिसोदिया (रा. सासी कडिया, जि. राजगड) यांची ओळख पटवली. त्यानंतर चोरीस गेलेले ४७ हजार ६३० रुपये आरोपींकडून हस्तगत केले. ही हस्तगत केलेली संपूर्ण रक्कम तक्रारदार आशाबाई देवरे यांना परत करण्यात आली.
चोरीस गेलेली रक्कम परत मिळाल्याने त्यांनी कासोदा पोलिसांचे आभार व्यक्त केले.
