जळगाव (प्रतिनिधी) शहरातील मेहरूण परिसरात राहणाऱ्या एका ३५ वर्षीय तरुणावर शनिवारी दोघांनी धारदार शस्त्राने हल्ला केला. हल्ल्यात गंभीर जखमी झालेल्या तरुणाला रुग्णालयात दाखल करण्यात आले होते. आज सकाळी या तरुणाचा मृत्यू झाला. पवन सोनवणे असे मयताचे नाव आहे.
यासंदर्भात अधिक असे की, मेहरूण परिसरात राहणाऱ्या पवन उर्फ घातक मुकुंदा सोनवणे या तरुणावर शनिवारी रात्री प्राणघातक हल्ला करण्यात आला होता. तरुणावर डोक्यात, मानेवर, पोटात वार करण्यात आल्याने त्याला गंभीर अवस्थेत सुरुवातीला जिल्हा सामान्य रुग्णालयात आणि नंतर खाजगी रुग्णालयात दाखल करण्यात आले होते. रविवारी सकाळी उपचार सुरू असताना पवनचा मृत्यू झाला. पवन उर्फ घातक सोनवणेवर एमआयडीसी पोलीस स्टेशनमध्ये काही गुन्हे दाखल आहेत. तसेच एकदा तो हद्दपार देखील झाला होता. शनिवारी रात्री सागर कंडारे आणि विशाल सपकाळे यांनी किरकोळ कारणावरून त्याच्यावर हल्ला केल्याची माहिती मिळाली आहे. रात्री उशिरा याप्रकरणी एमआयडीसी पोलीस ठाण्यात रात्री कलम ३०७ प्रमाणे गुन्ह्याची नोंद करण्यात आली होती. पवनच्या मृत्यूनंतर खुनाचा गुन्हा दाखल करण्याचे काम सुरू आहे.
