एरंडोल (प्रतिनिधी) – शहरातील बस स्थानकाजवळ गुरुवारी दुपारी झालेल्या भीषण अपघातात दुचाकीस्वाराचा जागीच मृत्यू झाल्याची दुर्दैवी घटना। घडली. या अपघातामुळे परिसरात हळहळ व्यक्ती केली जात असून नागरिकांनी वाहतूक व्यवस्थेबाबत तीव्र नाराजी व्यक्त केली आहे.
तालुक्यातील जवखेडे बुद्रुक येथील विजय सांडू पाटील (वय ५८) हे जामनेर, बोदवड येथे लग्न समारंभासाठी गेले होते. तेथून परतल्यानंतर ते आपल्या दुचाकीने एरंडोल बस स्थानकाजवळील समांतर रस्त्यावरून जात होते. त्याचवेळी बस डेपोमधून बाहेर पडणारी धुळे ते बुलढाणा मार्गावरील एस.टी. बस (एमएच १४, बीटी ४९८०) जळगावच्या दिशेने निघाली होती. बस डेपोमधून बाहेर येताना बसची समोरून दुचाकीला जबर धडक बसली. ही धडक इतकी भीषण होती की, विजय पाटील यांचा जागीच मृत्यू झाला. अपघातानंतर परिसरात नागरिकांनी मोठी गर्दी केली होती. घटनेची माहिती मिळताच पोलिसांनी घटनास्थळी धाव घेत पंचनामा केला. दरम्यान, मयत विजय पाटील हे परिसरात प्रगतिशील शेतकरी म्हणून परिचित होते. तसेच जवखेडे बुद्रुक येथील पो.पा. दिनकर पाटील यांचे ते बंधू होत. त्यांच्या निधनामुळे गावात शोककळा पसरली आहे.
