यावल (प्रतिनिधी) तुमच्या मुलास एका गुन्ह्यात आम्ही पकडले आहे, त्याला सोडवायचे असेल तर तात्काळ पैसे द्या असे सांगत यावल येथील एका दाम्पत्याची १ लाख ३० हजार मध्ये फसवणूक झाली असुन या गंभीर प्रकरणी यावल शहरातील पोलिसात अज्ञाता विरुद्ध गुन्हा दाखल करण्यात आला आहे.
शहरातील विस्तारित भागात राज्य परिवहन मंडळातून सेवानिवृत्त झालेले इसम आपल्या पत्नीसह राहतात. त्यांचा मुलगा एरोली, मुंबई येथे एका कंपनीत नोकरीला आहे. बुधवारी ११ वाजेच्या सुमारास त्यांना व्हाट्सअप वर कॉल आला. संबंधीत इसमाने आपण सीबीआय अधिकारी आहोत आणि तुमच्या मुलाला गैरकृत्य प्रकरणी ताब्यात घेतले आहे, असे सांगितले. तुम्ही तात्काळ दीड लाख रुपये द्या अशी पैशांची मागणी केली. तसेच त्यांच्या मुलाची भयभीत अवस्थेतील बनावटम ऑडिओ क्लिप त्यांना ऐकवली. तेव्हा संबंधित वृध्द इसम घाबरून गेले व त्यांनी त्यांच्या व त्यांच्या पत्नीच्या खात्यातून एक लाख ३० हजार रुपये संबंधित इसमाने दिलेल्या फोन पे खात्यावर पाठवले व कॉल कट केला आणि त्यांनी तात्काळ त्यांच्या मुलाला कॉल केला. तेव्हा मुलाने आपण मुंबई येथे आहोत व मला कोणीच पकडले नव्हते किंवा, अशी कुठली घटना घडली नव्हती असे त्यांनी सांगताच वृद्ध दांपत्याची फसवणूक झाल्याचे निदर्शनास आले. तेव्हा त्यांनी ऑनलाईन तसेच यावल पोलीस ठाण्यात अज्ञात मोबाईल वापरकर्ते विरुद्ध गुन्हा दाखल केला आहे.
