मुंबई (वृत्तसंस्था) आज सकाळपासून मुंबईत दोन महत्त्वाच्या बैठका झाल्यामुळे राजकीय क्षेत्रात चर्चांना आणि तर्क-वितर्कांना उधाण आले आहे. आज सकाळीच शिवसेना खासदार संजय राऊत यांनी राष्ट्रवादी काँग्रेसचे अध्यक्ष शरद पवार यांची भेट घेतल्यानंतर पवार यांच्या उपस्थितीत गृहमंत्री दिलीप वळसे पाटील यांच्या निवासस्थानी एक महत्त्वाची बैठक झाली. विशेष म्हणजे या बैठकीत मुंबईचे पोलीस आयुक्त हेमंत नगराळे देखील उपस्थित होते.
सकाळी शिवसेना प्रवक्ते आणि खासदार संजय राऊत यांनी राष्ट्रवादी काँग्रेसचे अध्यक्ष शरद पवार यांची भेट घेतल्यानंतर शरद पवार यांच्या उपस्थितीत गृहमंत्री दिलीप वळसे पाटील यांच्या निवासस्थानी देखील एक महत्त्वाची बैठक झाली. तासभर झालेल्या या बैठकीत मुंबईचे पोलीस आयुक्त हेमंत नगराळे देखील उपस्थित असल्यामुळे यातून वेगवेगळे तर्क काढले जात आहेत.
आज दुपारी राज्याचे माजी मुख्यमंत्री आणि विद्यमान विधानसभा विरोधीपक्षनेते देवेंद्र फडणवीस हे पत्रकार परिषद घेणार आहेत. नवाब मलिक यांच्याविषयी या पत्रकार परिषदेत ते भूमिका मांडण्याची शक्यता आहे. त्यापाठोपाठ दुपारी १ वाजता नवाब मलिक देखील पत्रकार परिषद घेणार आहेत. एकीकडे या घडामोडी घडत असताना दुसरीकडे संजय राऊतांनी आज अचानक शरद पवारांची सिल्व्हर ओकवर जाऊन भेट घेतल्याने सगळ्यांच्याच भुवया उंचावल्या. त्यापाठोपाठ शरद पवारांनी थेट राज्याचे गृहमंत्री दिलीप वळसे पाटील यांचं निवासस्थान गाठलं आणि तिथे गृहमंत्र्यांसोबतच मुंबईचे पोलीस आयुक्त हेमंत नगराळे यांच्यासोबत तासभर बैठक झाली. त्यामुळे मुंबईत हालचाली वाढल्याचं चित्र दिसू लागलं आहे.
