धाराशिव (वृत्तसंस्था) धाराशिव येथून मुरुडकडे जात असताना खड्डे चुकविण्याच्या नादात कारवरील ताबा सुटून सदरची कार रस्त्यालगत उभे असलेल्या प्रवाशांना जोरदार धडक देऊन रस्त्याच्या खाली बाभळीच्या झाडावर जाऊन आदळली. हा अपघात गुरूवारी (दि. ९)सायंकाळी ६ वाजेच्या सुमारास धाराशिव तालुक्यातील खामगाव शिवारात घडली असून यामध्ये कारचालकासह रस्त्याच्या कडेला उभारलेल्या प्रवाशी महिलेचा मृत्यू झाला तर अन्य चौघे जखमी झाले आहेत.
धाराशिव येथून कार क्रमांक (एमएच २४ डब्ल्यू १३६३) घेऊन शुभम विष्णु शिंदे (वय ३०) व शुभांगी श्रावण शहाणे (वय २८ रा दोघे मुरुड) हे गुरूवारी सायंकाळी मुरुडकडे जात होते. त्यांची कार खामगाव पाटीजवळ पोहचली असता खड्डे चुकविण्याच्या नादात शुभमचा कारवरील ताबा सुटल्याने कार विरूध्द दिशेला गेली. यावेळी तेथे धाराशिवकडे जाण्यासाठी उभारलेले प्रवाशी बंकट बजरंग काळे (६५ रा. धाराशिव), गोविंद सावंत, गिता गोविंद सावंत (वय ३०), गायत्री गोविंद सावंत (वय ३ रा सर्व खामगाव) यांना जोराची धडक देऊन कार रस्त्यालगतच्या बाभळीच्या झाडावर जाऊन जोरदार आदळली.
यामध्ये गंभीर दुखापत होऊन कारचालक शुभम शिंदे तसेच बसची वाट पहात उभारलेल्या गिता गोविंद सावंत हे गंभीर जखमी झाले. त्यांना उपचारासाठी दवाखान्याकडे नेण्यात येत असताना त्यांचा मृत्यू झाला. तर कारमधील शुभांगी शहाणे, तसेच रस्त्यालगत उभारलेले बंकट काळे, गोविंद सावंत, गायत्री सावंत हे जखमी झाले आहेत. त्यांच्यावर जिल्हा रुग्णालयात उपचार सुरु आहेत
दिवाळीसाठी माहेरी जाताना विवाहितेवर काळाचा घाला !
खामगाव येथील गीता गोविंद सावंत या दिवाळीनिमित्त मुलांसह धाराशिव तालुक्यातील पोहनेर या आपल्या माहेरी जाण्यासाठी तर त्यांचे पती त्यांना बसमध्ये बसविण्यासाठी या ठिकाणी बसची वाट पाहत थांबले होते. मात्र, या अपघातात त्यांचा मृत्यू झाला. यामुळे गावात हळहळ व्यक्त होत आहे.
