जळगाव (प्रतिनिधी) एटीएममध्ये पैसे काढण्यासाठी आलेल्या पोलिस मुख्यालयातील एका महिलेची एटीएम कार्डची अदलाबदली करून १५ हजाराची फसवणूक झाल्याची घटना उघडकीस आली आहे.
या संदर्भात अधिक असे की, पोलिस मुख्यालयात नोकरीला असलेल्या नंदा पानपाटील शुक्रवार, दि. ३१ मार्च रोजी दुपारी ३ वाजता छत्रपती शिवाजी महाराज क्रीडा संकूलसमोरील एसबीआय बँकेच्या एटीएममध्ये पैसे काढण्यासाठी आल्या होत्या. यावेळी एटीएममधून पैसे निघाले नाही म्हणून त्यांनी मागे उभा असलेला अनोळखी व्यक्तीकडे मदत मागितली. त्या व्यक्तीने त्यांना एटीएममधून ९ हजार ५०० रूपये काढून देत तेथून निघून गेला.
पुन्हा पैसे काढायचे असल्याने नंदा पानपाटील पुन्हा पैसे काढण्याचा प्रयत्न केला. परंतू, पैसे निघाले नाहीत. यावेळी दुसरा अनोळखी व्यक्ती त्यांच्याजवळ येवून मी तुम्हाला मदत करतो, असे सांगून बोलण्यात गुंतविले. नंतर हातचलाखीने एटीएमची अबदलाबदल केली. त्यानंतर एटीएममधील काही तांत्रिक अडचणीमुळे तुमचे पैसे निघत नाही असे सांगून तो भामटा तेथून निघून केला.
काही मिनिटांनी पानपाटील यांना एटीएम कार्ड अदलाबदल झाल्याचे लक्षात आल्यानंतर त्यांनी लागलीच बँकेमॅनेजर यांची भेट घेवून एटीएम ब्लॉक करण्यास सांगितले. मात्र, तोपर्यंत चोरट्याने गणेश कॉलनीतील एका बँकेच्या एटीएममधून १५ हजार रूपये काढल्याचे लक्षात आले. याबाबत रविवारी नंदा पानपाटील यांनी जिल्हापेठ पोलिस ठाणे गाठून तक्रार देत अज्ञात व्यक्तीविरुद्ध गुन्हा दाखल करण्यात आला असून पुढील तपास पोहेकॉ फिरोज तडवी हे करीत आहेत.
