मुंबई (वृत्तसंस्था) शिवसेनेच्या (ठाकरे गट) उपनेत्या सुषमा अंधारे (Sushma Andhare) आज शिवसेनेचे (Shinde Group) आमदार संजय शिरसाट (Sanjay Shirsat) यांच्याविरोधात अब्रुनुकसानीचा दावा दाखल करणार आहेत. पुण्यातील शिवाजीनगर कोर्टात सुषमा अंधारे यांच्यावतीने संजय शिरसाट यांच्यावर केवळ तीन रुपयांचा अब्रुनुकसानीचा दावा दाखल करणार आहेत.
आमदार संजय शिरसाट यांची छत्रपती संभाजीनगरमधील मेळाव्यात सुषमा अंधारे यांच्याबद्दल बोलताना जीभ घसरली होती. ते म्हणाले होते की, ती बाई म्हणते सगळेच माझे भाऊ आहेत. सत्तार भाऊ माझेच भाऊ आहेत, भुमरे भाऊ पण माझेच भाऊ आहेत म्हणते. पण तिने काय-काय लफडी केली आहेत, हे तिलाच माहीत. अरे पण तू आहे तरी कोण? आम्ही आमची ३८ वर्षे शिवसेनेसाठी घालवली. आता तुम्ही येऊन आम्हाला मार्गदर्शन करताय आणि काही उरलेले लोक टाळ्या वाजवत आहेत, असे वक्तव्य केले होते. यानंतर या वक्तव्याबद्दल सुषमा अंधारे यांनी राज्य महिला आयोगाकडे तक्रार केली होती. महिला आयोगाच्या अध्यक्ष रूपाली चाकणकर यांनी छत्रपती संभाजीनगरच्या पोलिस आयुक्तांनी चौकशी करून कारवाई करावी. त्या कारवाईचा अहवाल सादर करावा, अशा सूचना दिल्या आहेत.
दरम्यान, एकीकडे संजय शिरसाट यांच्यावर गुन्हा दाखल करण्याची मागणी केली जात असतानाच या सर्व आरोपांवर संजय शिरसाट यांनी मागील आठवड्यात पत्रकार परिषद घेऊन आपली भूमिका मांडली. सुषमा अंधारेंबद्दल एकही शब्द ‘अश्लील’ बोलल्याचा दाखवा, मी तात्काळ राजीनामा देतो, असं शिरसाट यांनी म्हटलं आहे.
