नवी दिल्ली (वृत्तसंस्था) देशात आगामी काळात पंतप्रधान पदासाठी योग्य उमेदवार कोण? या प्रश्नाला उत्तर देताना गेल्या वर्षभरात पंतप्रधान नरेंद्र मोदींची लोकप्रियता कमालीची घटलेली दिसून आलीय. पंतप्रधान नरेंद्र मोदींची लोकप्रियता गेल्या एका वर्षांत ६६ टक्क्यांवरून घसरून केवळ २४ टक्क्यांवर येऊन पोहचलीय. म्हणजेच वर्षभरात मोदींच्या लोकप्रियतेत ४२ टक्क्यांची घट नोंदविण्यात आलीय.
‘इंडिया टुडे’ या एका इंग्रजी चॅनलनं केलेल्या ‘मूड ऑफ द नेशन’ नावानं एक सर्व्हे केला होता. या सर्व्हेनंतर हा निष्कर्ष समोर आलाय. पंतप्रधान मोदींची लोकप्रियता कमी होण्यामागील सर्वात महत्वाचं कारण म्हणजे कोरोना परिस्थिती हाताळण्यात केंद्र सरकारला आलेलं अपयश. “कोरोनाची पहिली लाट आली तेव्हा पंतप्रधान मोदींची नेता म्हणून लोकप्रियता जानेवारी २०२१ मध्ये ७३ टक्के इतकी होती. मात्र दुसऱ्या लाटेमधील केंद्र सरकारचा कारभार आणि त्यामुळे सर्वसामान्यांना झालेल्या अडचणी यामुळे मोदींची लोकप्रियता ४९ टक्क्यांनी कमी झालीय,”
निवडणूक प्रचार सभांमुळेच देशामध्ये कोरोनाची दुसरी लाट आल्याचं मत २७ टक्के भारतीयांनी व्यक्त केलं आहे. तर २६ टक्के लोकांनी कोरोना संदर्भातील नियमांचं पालन न केल्याने दुसरी लाट आल्याचं मत व्यक्त केलंय. तर मोदी सरकारला कोरोनाची परिस्थिती हाताळण्यात अपयश आल्याचं मत २०२० साली ऑगस्ट महिन्यात २३ टक्के लोकांनी व्यक्त केलेलं. आता एका वर्षानंतर मोदी सरकारच्या कोरोनासंदर्भातील कामावर नाराज असणाऱ्यांची संख्या वाढून ४९ टक्क्यांवर गेलीय.
देशासमोरील सर्वात मोठा प्रश्न हा कोरोना परिस्थिती असल्याचं मत २३ टक्के लोकांनी व्यक्त केलंय. २९ टक्के लोकांनी महागाई आणि वाढत्या किंमती हे मोदी सरकारचं सर्वात मोठं अपयश असल्याचं मत व्यक्त केलंय तर २३ टक्के लोकांनी बेरोजगारांची वाढती संख्या हे मोदी सरकारचं अपयश असल्याचं म्हटलं आहे.
