धरणगाव (प्रतिनिधी) येथील शतकोत्तर पी.आर.हायस्कूलमध्ये दहावीच्या परीक्षेत यशस्वी ठरलेल्या मुलींनी अतिशय प्रतिकूल परिस्थितीतून अभ्यास करून मागासवर्गीय वाड्या वस्तीतून गुणवत्तेचा डंका वाजवला असून ‘आकांक्षा पुढती जिथे गगन ठेंगणे ‘ ही उक्ती सार्थ केली आहे.
विशेष म्हणजे हे विद्यार्थी धरणगाव परिसराच्या चारही दिशांतले आहेत. शाळेतून ९४.६० टक्के गुण मिळवून प्रथम आलेली कु. पूर्वा दत्तात्रेय केले ही वाणी गल्लीची रहिवासी आहे. तिचे वडील अर्बन बँकेचे सेवानिवृत्त चतुर्थ श्रेणी कर्मचारी आहेत. ९३ टक्के गुण मिळवून द्वितीय आलेली कु. भाग्यश्री सुभाष सोनवणे ही वैदू वाड्यातील रहिवासी असून या समाजात प्रथमच एका मुलीने असे यश संपादन केले असावे. अतिशय प्रतिकूल परिस्थितीत तिने अभ्यास करून व्हाॅलीबाॅल या खेळात ती राष्ट्रीय स्तरावर पोहोचलेली उत्तम क्रीडापटू आहे.
९३ टक्के गुण मिळवून द्वितीय आलेला अनुराग सुधीर शिंदे हा रोटवद या ग्रामीण भागातील विद्यार्थी आहे. तर ९२.६० टक्के गुण मिळवून तृतीय स्थान पटकावणारी भाग्यश्री योगराज मोरे ही विद्यार्थिनी गौतमनगरच्या मागासवर्गीय वस्तीतील असून तिचे वडील मयत झाले आहेत. तर आई नगरपालिकेत सफाई कर्मचारी म्हणून सेवेत आहे. छोट्या मातीच्या घरात राहून तिने अभ्यास केला आहे. अनेक वक्तृत्व स्पर्धा तिने गाजवून बक्षीसे मिळवली आहेत. शालेय शिक्षण विभागाच्या निर्देशानुसार शाळेने काॅपीमुक्त अभियान यशस्वीपणे राबवून ९८ टक्के निकाल लावला आहे.
या यशस्वी विद्यार्थ्यांना अनेक दात्यांनी ठेवलेल्या ठेवीतून बक्षीसाची रक्कम मिळणार आहेच पण यंदा पासून शाळेच्या १९९७ च्या बॅचच्या माजी विद्यार्थ्यांच्या दातृत्वातून १०० ग्रॅम चांदीचे बक्षीसही मिळणार आहे. शाळेचे माजी विद्यार्थी तथा राज्याचे अतिरिक्त आयकर आयुक्त श्री. विशाल मकवाने आणि बॅचच्या विद्यार्थ्यांनी हे दातृत्व स्वीकारले आहे. पी.आर.हायस्कूल सोसायटीचे अध्यक्ष डॉ.अरूण कुलकर्णी, उपाध्यक्ष वसंतराव गालापुरे, सचिव डॉ. मिलिंद डहाळे, संचालक अजय पगारीया, मुख्याध्यापक डॉ. संजीवकुमार सोनवणे, उपमुख्याध्यापिका डॉ.आशा शिरसाठ पर्यवेक्षक कैलास वाघ आणि सर्व शिक्षक बंधू भगिनी आणि शिक्षकेतर कर्मचारी यांनी यशस्वी विद्यार्थ्यांचे अभिनंदन केले आहे.
