जळगाव (प्रतिनिधी) भरधाव वेगाने येणाऱ्या अज्ञात वाहनाच्या धडकेत भुसावळ तालुक्यातील एकाचा उपचारादरम्यान मृत्यू झाल्याची घटना गोदावरी इंजिनिअरींग कॉलेज समोरील महामार्गावर सोमवारी घडली आहे. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे. खलील शेख अय्युब मणियार (वय-४५ रा. वराडसीम ता. भुसावळ), असे मयत झालेल्या दुचाकीस्वाराचे नाव आहे.
भुसावळ तालुक्यातील वराडसीम गावात खलील शेख अय्युब मणियार हे आपल्या पत्नी व दोन मुलांसह वास्तव्याला होतो. भाजीपाला विक्री करून ते आपला उदरनिर्वाह करत होते. सोमवारी ८ जुलै रोजी सकाळी ७ वाजेच्या सुमारास ते दुचाकीने जळगाव शहरातील गोदावरी इंजिनिअरींग कॉलेजजवळून दुचाकीने जात असतांना भरधाव वेगाने येणाऱ्या अज्ञात वाहनाचे त्यांच्या दुचाकीला जोरदार धडक दिली. यात ते गंभीर जखमी झाले. त्यांना खासगी वाहनाने शासकीय वैद्यकीय महाविद्यालय व रूग्णालयात उपचारार्थ दाखल करण्यात आले होते. त्यांच्यावर उपचार सुरू असतांना सायंकाळी ५ वाजता मृत्यू झाला. एमआयडीसी पोलीसात अकस्मात मृत्यूची नोंद करण्यात आली आहे. पुढील तपास पोलीस नाईक पंकज पाटील हे करीत आहे. त्यांच्या पश्चात पत्नी व दोन मुले असा परिवार आहे
