नाशिक (वृत्तसंस्था) कोविड प्रतिबंधक लस न घेतलेल्यांना नाशिक जिल्ह्यात सार्वजनिक ठिकाणी प्रवेश न देण्याचा निर्णय नाशिक जिल्हा प्रशासनानं घेतला आहे. अन्न, नागरी पुरवठा व ग्राहक संरक्षण मंत्री तथा नाशिक जिल्ह्याचे पालकमंत्री छगन भुजबळ यांनी पत्रकार परिषदेत ही माहिती दिली आहे.
पत्रकार परिषदेत छगन भुजबळ म्हणाले की, जिल्ह्यात सध्या कोरोनाचे ४०१ रूग्ण आहेत. पॉझिटिव्हिटी दर आणि मृत्यूदर आधीपेक्षा कमी झालाय. जिल्ह्यात ३७३ मेट्रिक ऑक्सिजनची सोय उपल्ब्ध असून २०० मेट्रिक टन ऑक्सिजन खासगी हॉस्पिटल आणि आस्थापनांकडे साठा आहे. नाशिक जिल्ह्यात आत्तापर्यंत ८६.८४ टक्के लसीकरण आहे मात्र आता लसीकरणाचा वेग कमी झालाय. लसीकरणाचा मोठा साठा शिल्लक आहे. ७८% नागरिकांनी पहिला डोस घेतला, तर केवळ ४० टक्के नागरिकांनी लसीचा दुसरा डोस घेतलाय अशी माहिती त्यांनी पत्रकार परिषदेत दिली.
लसीकरण वाढवण्यासाठी भुजबळांनी मोठी घोषणा केली, शासकीय कार्यालयं, बाजारसमिती, सार्वजनिक ठिकाणं, मार्केट, आस्थापनांच्या ठिकाणी लस घेतली नसल्यास प्रवेश नाही अशी माहिती त्यांनी दिली आहे. तसेच सोमवारपासून नाशिकमध्ये सार्वजनिक ठिकाणी वॅक्सिन न घेतलेल्यांना जिल्ह्यात प्रवेश करता येणार नाही असंही ते म्हणाले आहेत. त्याचप्रमाणे ३१ डिसेंबरच्या पार्टी आणि कार्यक्रमांना नियम आणि अटी शर्तींवर परवानगी मिळणार आहे. नियम न पाळल्यास संबंधितांवर कारवाई होईल. त्यामुळे आता नाशिकमध्ये सार्वजनिक ठिकाणी प्रवेश करायचा असल्यास लसीकरण आणि कोरोनाचे सर्व नियम पाळणं बंधनकारक आहे.
