जळगाव (प्रतिनिधी) आमोदा ते कानळदा दरम्यान डॉ. प्रताप जाधव यांच्या शेताच्या समोर कुत्र्याला वाचविण्याच्या प्रयत्नात गोपाळ ज्ञानेश्वर चौधरी (वय २३ रा. तावसे बु. ता. चोपडा) या तरुणाने आपला जीव गमावला आहे. याप्रकरणी जळगाव तालुका पोलीस स्थानकात अज्ञात कार चालकाविरुद्ध गुन्हा दाखल करण्यात आला आहे.
या संदर्भात अधिक असे की, गोपाल ज्ञानेश्वर चौधरी हा तरुण दि. १७ जून २०२२ रोजी आपल्या बजाज मोटार सायकल (क्र.एम.एच.-१९ ए.एफ. ००३७) वरून घरी जात होता. दरम्यान, सायंकाळी १९.४५ वाजेच्या सुमारास डॉ. प्रताप जाधव यांच्या शेताच्या समोर अचानक रस्त्यात कुत्रा आला. कुत्र्याला वाचविण्याच्या प्रयत्नात गोपाल दुचाकीवरून खाली पडला. याचवेळी पाठीमागून एक पांढ-या रंगाच्या कारने गोपालला जोरदार धडक दिली. या धडकेत गोपालचा जागीच मृत्यू झाला. या प्रकरणी सोपान सुभाष पाटील (वय ३८ रा. आव्हाणे ता.जि.जळगाव) यांच्या फिर्यादीवरून पांढ-या रंगाच्या कारवरील चालक (नाव-गाव माहित नाही) विरुद्ध गुन्हा दाखल करण्यात आला असून पुढील तपास पोहेका सतिष हाळणोर हे करीत आहेत.
