जळगाव (प्रतिनिधी) बनावट आधारकार्डद्वारे न्यायालयात जामीन देणाऱ्या महादू दत्तराव पवार (वय ४४, रा. जवळा, बु. हयात नगर, जि. हिंगोली) या संशयिताला न्यायालयातील लिपीकाने पडताळणी करतांना रंगेहाथ पकडले. त्याच्याकडून दोन वेगवेगळी आधारकार्ड जप्त करण्यात आले असून त्याच्याविरुद्ध शहर पोलिसात गुन्हा दाखल करण्यात आला आहे.
शहर पोलीस ठाण्यातल्या गुन्हे शोध पथकातील कर्मचारी अमोल ठाकुर व राहुल पांचाळ यांची गुरुवारी बीट मार्शल म्हणून नेमणुक करण्यात आली होती. त्यांना ठाणे अंमलदार यांनी फोन करुन जिल्हा सत्र व न्यायालयातील कोर्ट रुम नं ११७ मधील तंत्र शाखेत एका इसमाला बनावट आधारकार्डद्वारे जामीन देतांना रंगेहाथ पकडल्याची माहिती दिली. त्यानुसार दोघे बीट मार्शल हे तात्काळ कोर्टात दाखल झाले.
याठिकाणी लिपीक प्रसाद प्रकाश महाले व कार्यालयीन अधीक्षक जगदिश ओंकार माळी यांनी महादू दत्तराव पवार याला पोलिसांच्या स्वाधीन केले. महाले यांनी महादू पवार याच्याजवळील दोन्ही आधारकार्ड घेतले असता, त्यावरील एक आधारकार्ड हे नामदेव तातेराव डाढाळे रा. जवळा बु. हयात नगर हिगोळी असे नमूद होते. बनावट आधारकार्डद्वारे महादू पवार हा न्यायालयात जामीन देण्यासाठी आला होता.
आधारकार्डवर चिटकवला फोटो आधारकार्डची पडताळणी करीत असतांना त्यामध्ये ही बाब उघड झाली. दरम्यान, संशयिताने त्याच्या गावातील नामदेव डाढाळे याच्या आधारकार्डवर स्वतःचा फोटो चिटकवून बनावट आधाकार्ड तयार केलेल्याचे पोलिसांच्या चौकशीत उघड झाले आहे. याप्रकरणी त्याच्याविरुद्ध शहर पोलिसात गुन्हा दाखल केला असून तपास मुद्दसर काझी हे करीत आहेत.
