कासोदा, ता. एरंडोल / जामनेर (प्रतिनिधी) जळगाव जिल्ह्यात अज्ञात चोरट्यांनी दोन ठिकाणी एटीएम कटरने कापून अवघ्या काही मिनिटात तब्बल दहा लाख रुपये लांबविल्याची घटना घडली आहे. त्यात एरंडोल तालुक्यातील कासोदा येथून साडेनऊ लाख, तर जामनेर तालुक्यातील नेरी येथून ४५ हजार रुपये चोरीस गेले आहेत.
कासोदा येथे बँकेचे एटीएम गॅस कटरच्या साह्याने कापले
कासोदा येथील बसस्टॅण्ड परिसरातील बिर्ला चौकातील एका बँकेचे एटीएम गॅस कटरच्या साह्याने कापून चोरट्यांनी अवघ्या काही मिनिटांत एटीएममधील ९ लाख ५५ हजार रुपये लंपास करत चोरट्यांनी चारचाकी वॅगनर गाडीचा वापर केल्याचे सीसीटीव्ही कॅमेऱ्यात कैद झाले आहे. दरम्यान, दीपक दौलत तिवारी (३८, सत्यम पार्क, दूध फेडरेशनजवळ जळगाव) यांच्या फिर्यादीवरून अज्ञात चोरट्यांविरुद्ध गुन्हा दाखल करण्यात आला असून पुढील तपास सपोनि नीता कायटे या करीत आहेत.
जामनेरात सतत वाहनांची वर्दळ असलेल्या ठिकाणचे एटीएम फोडले
जळगाव-औरंगाबाद राज्य मार्गावर असलेले नेरी (ता. जामनेर) येथील टाटा इंडीकसचे एटीएम बुधवारी मध्यरात्री अज्ञात चोरट्यांनी कटरच्या सहाय्याने कापून ४५ हजार ५०० ची रोकड़ लांबवली. राज्य मार्गावर सतत वाहनांची वर्दळ असलेल्या ठिकाणी हे एटीएम आहे. एटीएम असलेल्या परिसरात सीसीटीव्ही कॅमेरा आहे. परंतू त्यातून काहीही माहिती समोर आले नसल्याचे कळते. गिरीश मधुकर पाटील यांनी दिलेल्या तक्रारीवरून पोलिसांनी गुन्हा दाखल केला आहे. चार महिन्यांपूर्वी जामनेर येथील आयडीबीआय बँकेचे पहूर रोडवरील एटीएम चोरट्यांनी कटरच्या सहाय्याने कापून सुमारे बारा लाख रुपये चोरून नेले होते. दरम्यान, घटनास्थळी जिल्हा पोलीस अधीक्षक प्रवीण मुंडेसह आदींनी भेटी दिल्यात.
