जळगाव (प्रतिनिधी) औद्योगिक वसाहती परिसरातील मोरया ग्लोबल लिमिटेड या कंपनीत झालेल्या स्फोटामध्ये दोन कामगार ठार तर २२ जण जखमी झाल्याची घटना गुरुवारी घडली. यात जखमी असलेल्या दोन कामगारांचा आज उपचारा दरम्यान मृत्यू झाला आहे. त्यामुळे मृतांची संख्या ४ वर पोहचली आहे. दरम्यान या घटने प्रकरणी कंपनी मालक, व्यवस्थापनाविरुद्ध एमआयडीसी पोलिस ठाण्यात गुन्हा दाखल झाल्यानंतर आज कंपनीच्या मालकासह व्यवस्थापकाला अटक करण्यात आली असुन त्यांना न्यायालयाने दोन दिवसाची पोलिस कोठडी सुनावली आहे. यातील प्रशासकीय अधिकारी मात्र फरार आहे.
दोघांचा उपचारादरम्यान मृत्यू
डब्ल्यू सेक्टरमधील मोरया ग्लोबल लिमिटेड कंपनीत आग लागल्याची घटना दि.१७ रोजी सकाळी घडली होती. अथक परिश्रमानंतर ही आग आटोक्यात आणण्यात आली होती. तर आगीत होरपळलेल्या कामगारांना तातडीने शासकीय वैद्यकीय महाविद्यालय व रुग्णालय, खासगी रुग्णालयांमध्ये दाखल करण्यात आले आहे. यातील दोन कामगारांचा मृत्यू झाला होता. आज उपचारा दरम्यान दोन कामगारांचा मृत्यू झाला आहे. त्यात किशोर दत्तात्रय चौधरी (रेणुकानगर, रामेश्वर कॉलनी) व दिपक वामन सुहा (विठोबानगर) असे मयतांचे नाव आहे.
कंपनी मालकासह व्यवस्थापकाला अटक
कंपनीतील स्फोटप्रकरणी कपिल राजेंद्र पाटील यांच्या फिर्यादीवरून कंपनी मालक अरुण निंबाळकर, व्यवस्थापक लोमेश सुकलाल रायगडे, प्रशासकीय अधिकारी अनिल गुलाब पवार या तिघांविरुद्ध एमआयडीसी पोलिस ठाण्यात सदोष मनुष्य वधासह कलम २२५, २८३, २८५, ३३७, ३३८ यानुसार गुन्हा दाखल करण्यात आला आहे. यात कंपनी मालकासह व्यवस्थापकाला अटक करण्यात आली असुन दोघांना न्यायालयाने दोन दिवसाची पोलिस कोठडी सुनावली आहे.
मुलांचे यश पाहण्यापुर्वीच किशोर चौधरींवर काळाची झडप !
एमआयडीसीतील कंपनीत स्फोट झाल्यानंतर आज दुसऱ्या दिवशी किशोर चौधरी यांची उपचारादरम्यान प्राणज्योत मालावली आहे. किशोर चौधरी हा गेल्या दोन ते तीन वर्षापासून कामाला होता. तर त्यांच्या पत्नी देखील याच कंपनीत काम करत आहे. किशोर व त्यांच्या पत्नी दोन्ही याच कंपनीत काम करून कुटुंबाचा गाडा ओढत होते. त्यांना दोन मुले असुन ते स्पर्धा परिक्षांची तयारी करत आहे. मुलांच्या शिक्षणाला कुठली ही अडचण येवू नये म्हणून ते दोन्ही कंपनीत काम करत होते. मुले स्पर्धा परिक्षा पास व्हावे असे स्वप्न मनी बाळगुण जीवापाड मेहनत करणाऱ्या किशोरने पैसे न खर्च करता आज ही पत्र्याच्या घरात राहत होते. मुलांचे यश पाहण्यापुर्वीच त्यांच्यावर काळाने झडप घातली.
घराचा ‘दिपक’ हिरावला !
दिपक साहू या कर्मचाऱ्यावर रूग्णालयात उपचार सुरू होते. पुढील उपचारासाठी मुंबई येथे हलविण्यात आले. मात्र उपचारासाठी घेवून जात असतांना नाशिक जवळच त्यांची प्राणज्योत मालावली. दिपक साहु हा घरातील एकुलता एक व कष्टाळू मुलगा होता. त्याच्या परिवारात आई, वडील व दोन बहिनी आहे. एक बहिण कौटुंबिक वादामुळे माहेरीच राहत होत्या. संपुर्ण कुटूंबाची जबाबदारी एकुलत्या एक दिपकवर होती. मात्र दिपकचा आज मृत्यू झाल्यानंतर बहिणीसह आई वडीलांवर दुःखाचा डोंगर कोसळला आहे.
