जळगाव (प्रतिनिधी) जिल्हा दूध संघ अपहार प्रकरणात संचालक मंडळ आता पोलिसांच्या रडारवर आल्याची माहिती सूत्रांनी दिली असून पोलीस त्यांचे जबाब नोंदवण्याची शक्यता वर्तवली जात आहे. अटकेतील संशयित आरोपी एमडी मनोज लिमये यांच्यासह इतरांच्या जबाबात आणि पोलीस तपासात मिळालेल्या माहितीवरून आता संचालक मंडळ रडारवर? असल्याचे कळते. दुसरीकडे त्रयस्थ अर्जदार म्हणून दूध संघातील माजी सुरक्षा अधिकारी एन. जे. पाटील यांनी न्यायालयात अर्ज सादर केल्यामुळे गुन्ह्याला आता आणखी एक वेगळे वळण मिळणार असल्याचे संकेत आहेत.
जळगाव जिल्हा दूध उत्पादक संघात अगोदर अपहार झाल्याचा अर्ज एका गटाने केला. दुसऱ्या गटाने नोंदीमध्ये तफावत समोर आणत चोरीची तक्रार दिली. गुन्हा दाखल करवून घेत नाहीत म्हणून उपोषणही करण्यात आले. यानंतर उच्च न्यायालयातही अपील करण्यात आले. अखेर सहाय्यक निरीक्षक संदीप परदेशी यांच्या फिर्यादीवरून गुन्हा दाखल करण्यात आला. दाखल गुन्ह्यात अटकसत्र राबविण्यात येऊन कार्यकारी अधिकारी मनोज लिमये, हरी पाटील, अनिल अग्रवाल आणि रवी अग्रवाल, चंद्रकांत पाटील, किशोर काशीनाथ पाटील अशा सहा संशयितांना अटक झाली. अटकेनंतर तपासात पोलिसांनी गोळा केलेले नमुने, आवश्यक दस्तऐवज आणि पुराव्यांच्या आधारावर संशयितांचे जाबजबाब नोंदवून पंचनामेही करण्यात आले. संशयितांनी पुरविलेली माहिती, प्राप्त दस्तऐवजाच्या आधारे तपासातील प्रगती पाहता चेअरमन मंदाकिनी खडसे व संचालक मंडळाच्या अडचणीत वाढ होण्याची शक्यता पोलिससूत्रांनी दिलेल्या संकेतावरून स्पष्ट होत आहे. पोलीस लवकरच चेअरमन आणि काही संचालकांचे जबाब नोंदवणार असल्याचे कळते. कारण दुध संघात तूप आणि लोणीच्या विक्रीतून होणार अपहार मागील साधारण दोन वर्षापासून सुरु असल्याचे पोलीस तपासात समोर आले आहे.
पोलिस सूत्रांनी दिलेल्या माहितीनुसार, दूध संघात मुकेश निंबाळकर (शिवाजीनगर) यांना कॅन्टीनचे कंत्राट देण्यात आले होते, तर योगेश निंबाळकर तूप पॅकेजिंगचे काम करीत होता. यांसह प्रदीप पाटील या तिघांच्या नावे अखाद्य तूप घेतल्याच्या नोंदी सापडून आल्या आहेत. तपासाधिकाऱ्यांनी या तिघांचीही चौकशी केली आहे. प्रदीप पाटील याने मंगळवारी दुपारी तीनला लेखी अर्ज सादर करून माझा या प्रकरणाशी काडीमात्र संबंध नसल्याचे सांगत पोलिसांना सहकार्य करण्याचे आश्वासन दिले आहे. या प्रकरणात संशयितांची जिल्हा कारागृहात रवानगी झाली असून, संशयितांच्या टोळीतील म्होरक्याविरुद्ध पुरावे संकलनाचे काम पोलिस करीत आहेत. न्यायालयात दाखल खटल्यात आता माजी सैनिक, तसेच दूध संघातील माजी सुरक्षा अधिकारी एन. जी. पाटील यांनी त्रयस्थ अर्जदार म्हणून अपील केले आहे.
