जळगाव (प्रतिनिधी) शहरातील आकाशवाणी चौकात असलेल्या कोचर हॉस्पिटल समोर एका तरुणीचा मोबाईल चोरून नेल्याची घटना शुक्रवारी ६ सप्टेंबर रोजी सायंकाळी ६ वाजता घडली होती. नागरिकांनी पाठलाग करून चोरट्याला पकडून पोलिसांच्या स्वाधीन केले आहे. याप्रकरणी रामानंदनगर पोलीस ठाण्यात एकावर गुन्हा दाखल करण्यात आला आहे. हर्षद शेख रईस (वय- २१, रा. श्यामा फायर समोर, तांबापुर, जळगाव), असे अटक केलेल्या चोरट्याचे नाव आहे.
दिव्या अशोक पवार (वय २४, रा. चोरगाव ता. धरणगाव) ही तरुणी हे जळगावात एका कंपनीत कामाला आहेत. नेहमीप्रमाणे शुक्रवारी ६ सप्टेंबर रोजी सायंकाळी ६ वाजता कंपनीतून घरी जाण्यासाठी आकाशवाणी चौकातून बसमध्ये चढत असताना संशयित आरोपी हर्षद शेख राईस याने तरुणीच्या पर्समधून मोबाईल काढला. दरम्यान मोबाईल चोरी झाल्याचे लक्षात आल्यानंतर तरुणीने आरडाओरड केली असता नागरिकांनी पाठलाग करून त्याला अटक केली. त्याच्याकडून १० हजार रुपये किमतीचा मोबाईल हस्तगत केला आहे. याप्रकरणी तरुणीने दिलेल्या फिर्यादीवरून रात्री ८ वाजता रामानंदनगर पोलीस ठाण्यात गुन्हा दाखल करण्यात आला आहे. या घटनेचा पुढील तपास पोलीस नाईक हेमंत कळस्कर हे करीत आहे.
