जळगाव (प्रतिनिधी) आमदार महाजन यांना मोक्का लावण्याची प्रक्रिया सुरु असल्यामुळे तर कोरोना झाला नाही ना? असे वक्तव्य माजी मंत्री एकनाथ खडसे यांनी शनिवारी केले होते. या वक्तव्याला २४ तासही उलटत नाही, तोच कोथरूडच्याच गुन्ह्यात पुण्याचे पथक जळगावात धडकल्यामुळे प्रचंड खळबळ उडालीय. परंतू दुसरीकडे मी काल बोलले आणि आज पथक आले, हा निव्वळ योगायोग असल्याची मिश्कील प्रतिक्रिया खडसे यांनी दिली आहे.
म्हणून खडसे यांचे वक्तव्य आणि कारवाईचा संबंध जोडला जातोय
आमदार महाजन यांना मोक्का लावण्याची प्रक्रिया सुरु असल्यामुळे तर कोरोना झाला नाही ना? असा प्रश्न माजी मंत्री एकनाथ खडसे यांनी शनिवारी उपस्थित केला होता. तसेच “माझी ईश्वरचरणी प्रार्थना आहे, गिरीशभाऊ लवकर बरे व्हावे. त्यांची प्रकृती, स्वास्थ्य चांगले रहावे. त्यांची समाजाला आणि महाराष्ट्राला गरज आहे’, असेही खडसे यांनी माध्यमांशी बोलतांना म्हटले होते. परंतू या वक्तव्याला २४ तासही उलटत नाही, तोच कोथरूडच्याच गुन्ह्यात पुण्याचे पथक जळगावात धडकले आहे. त्यामुळे खडसे यांचे वक्तव्य आणि कारवाईचा संबंध जोडला जात आहे. दरम्यान, कालच ईडीची तारीख आल्यावर जे स्वत: कोरोनाचे बोगस सर्टिफिकेट देतात, त्यांना माझे अाव्हान आहे. माझा कोरोना रिपोर्ट बनावट असेल तर कुठल्याही लॅबमधून तपासणी करावी, असे प्रत्त्यूत्तर आमदार महाजन यांनी खडसेंना दिले होते.
हा निव्वळ योगायोग : खडसे
पाच ठिकाणी पथकाची कारवाई सुरु असल्याची माहिती आपल्यापर्यंत मिळाली आहे. गुन्हा दाखल झाल्यानंतर कारवाई होतेच. राहिला प्रश्न माझ्या कालच्या वक्तव्याच्या आणि आजच्या कारवाईचा तर हा निव्वळ योगायोग असल्याची प्रतिक्रिया माजी मंत्री एकनाथराव खडसे यांनी हसत-हसत दिली.
