नागपूर (वृत्तसंस्था) भिवापूर तालुक्यातील नांद ग्रामपंचायत सदस्याचा किरकोळ वादातून धारदार शस्त्राने खून करण्यात आल्याची घटना शनिवारी (१४ ऑक्टोबर) मध्यरात्री साडेबारा वाजताच्या सुमारास घडली. दिनेश सुरेश चाचेरकर (३२), असे मृतक ग्रामपंचायत सदस्याचे तर आरोपीचे नाव चेतन कवडू चुटे (रा. नांद), असे आहे.
आरोपी चेतन चुटेचा मोठा भाऊ सूरज कवडू चुटेचा मृतक दिनेशसोबत किरकोळ वाद झाला होता. ही बाब आरोपीला माहीत झाली. आरोपीने दिनेशला गाठले. सोबत धारदार शस्त्र नेले होते. दरम्यान वाद घातला. या वादाचे रूपांतर हाणामारीत झाले. काही कळायच्या आत आरोपीचे कंबरेमध्ये ठेवलेले शस्त्र काढून मृतकाच्या पोटावर व इतरत्र वार केले. त्यानंतर आरोपी घटनास्थळावरून पसार झाला. घटनास्थळी दिनेश रक्ताच्या थारोळ्यात पडला. त्याला गंभीर जखमी अवस्थेत उपचारार्थ उमरेड येथे हलविण्यात आले. मात्र, वाटेतच त्यांचा मृत्यू झाला. पोलिसांनी तात्काळ शोध मोहीम राबवून आरोपीला ताब्यात घेतले आहे. मृतकावर रविवारी (१५ ऑक्टोबर) नांद येथील स्मशानभूमीत अंत्यसंस्कार करण्यात आले. मृतक दिनेश हे ग्रामपंचायत सदस्य होते. त्यांच्या पश्चात पत्नी, लहान मुलगा, मुलगी, आई-वडील व बराच मोठा आप्तपरिवार आहे.
नेमकं काय घडलं !
दिनेश त्याच्या दोन मित्रांसोबत नांद येथील बीयर बारमध्ये शनिवारी रात्री १०.३० वाजताच्या सुमारास दारू पीत बसले होते. त्यातच आरोपी चेतनचा धाकटा भाऊ सूरज कवडू चुटे याने गमतीने दिनेशच्या शर्टवर मागून पाणी ओतले. त्यामुळे चिडलेल्या दिनेशने सूरजच्या कानशिलात हाणली. मात्र, दोघांच्याही मित्रांनी वाद विकोपास जाण्यापूर्वी शांत केला आणि सर्व जण आपापल्या घरी शांतपणे निघून गेले. त्यानंतर हा वाद कुणीतरी सूरजचा मोठा भाऊ चेतनला फोन करून सांगितला. चेतनने दारू ढोसली व मध्यरात्री दिनेशच्या घराजवळ गेला. त्याने फोन करून दिनेशला बाहेर बोलावले. सूरजला मारहाण केल्यावरून दोघांमध्ये भांडण झाले. याच भांडणात दिनेशचा खून झाल्याचे एका दैनिकाने आपल्या वृत्तात म्हटले आहे.