जळगाव (प्रतिनिधी) ‘बीएचआर’ घोटाळ्याचा पाठपुरावा करणारे माजी मंत्री एकनाथराव खडसे यांच्या नावाच्या पतसंस्थेतच ठेवीदारांच्या ठेवी अडकल्या असल्याची धक्कादायक माहिती आज समोर आली. माहिती अधिकार कार्यकर्ते दीपककुमार गुप्ता यांनी दोन ठेविदारांसोबत आज पत्रकार परिषद घेऊन याबाबतचा गौप्यस्फोट केला.
दीपककुमार गुप्ता यांनी आज हॉटेल मोराक्कोमध्ये पत्रकार परिषद घेतली. गुप्ता यावेळी म्हणाले, वरणगाव येथील दोन ठेविदारांनी माझ्याकडे मदतीसाठी निवेदन दिले. त्यानुसार यादव जगन्नाथ पाटील (रा.तळवेल ता.भुसावळ) व प्रकाश रघुनाथ चौधरी (रा. राम पेठ, वरणगाव) या दोघांनी वरणगाव येथील एकनाथराव खडसे ग्रामीण बिगर-शेती सहकारी संस्थेत दामदुप्पट योजनेअंतर्गत यादव पाटील यांनी ९१ हजार ठेवले होते. तर त्यांचे सासरे ज्ञानदेव कीटकूल भंगाळे व नंदकुमार पाटील यांच्यावावर ६९, हजार १०० रुपये ठेवले होते. तसेच रघुनाथ चौधरी यांनी एकनाथराव खडसे ग्रामीण बिगरशेती सहकारी पतसंस्थेत पत्नी आशा बाई चौधरी यांच्या नावे दाम दुप्पट ठेवी योजनेत दहा हजार रुपये ठेवले असल्याची माहिती दिली. दरम्यान, एकनाथराव खडसे ग्रामीण बिगर-शेती सहकारी संस्था ही दुसर्याच संचालकांनी सुरू केली असल्याचेही त्यांनी सांगितले. दरम्यान, खडसे यांच्या नावामुळे खडसे यांनी ठेविदारांना न्याय मिळवू द्यावा अशी मागणी दीपककुमार गुप्ता यांनी याप्रसंगी केली. दरम्यान, या पत्रकार परिषदेमुळे जिल्ह्याच्या राजकारणात प्रचंड खळबळ उडाली आहे.
