औरंगाबाद (वृत्तसंस्था) विवाहिता सकाळपासून बेपत्ता झाल्याची माहिती कळताच माहेरच्या लोकांनी तिचे सासरचे घर गाठून हल्ला चढविला. सोमवारी रात्री साडेआठच्या सुमारास शिवाजीनगर भागात हि घटना घडली आहे. या हल्ल्यात दोन जण जखमी झाले आहेत.
घटनेची माहिती मिळताच पुंडलिकनगर आणि जवाहर नगर ठाण्यातील पोलिसा घटनास्थळी दाखल झालेत. शिवाजीनगर परिसरात पाण्याच्या टाकीजवळ राहणारी शिवकन्या चव्हाण ही २३ वर्षीय विवाहिता सोमवार सकाळपासून बेपत्ता आहे. ही माहिती तिच्या माहेरकडील नातेवाईकांना माहीत झाली. तेव्हा माहेरकडील लोक शिवकन्या चव्हाण हिच्या शिवाजीनगर येथील सासरच्या घरी येऊन धडकले. आमची मुलगी कोठे आहे, असा प्रश्न करत विवाहितेच्या दीर आणि त्याच्या आईला मारहाण करण्यास सुरुवात केली. अचानक झालेल्या हल्ल्याने परिसरातील लोक मध्यस्थी करण्यासाठी आले असता, त्यांना देखील धक्काबुक्की करण्यात आली. या हल्ल्यात विवाहितेचा दीर अक्षय उत्तम चव्हाण आणि अक्षयची आई जखमी झाली आहे. त्यांना पुंडलिकनगर पोलिसांनी तातडीने शहानूरमिया दर्गा परिसरातल्या एका खासगी रुग्णालयात दाखल केले आहे. मुलीच्या वडिलांनी आरोप केला आहे की, त्यांच्या मुलीचा घातपात करण्यात आला असून, तिचा पती हा पसार झाल्याचा आरोपही त्यांनी केला आहे.
