भुसावळ (प्रतिनिधी) माहेरुन दोन लाख रुपये घेण्याच्या उद्देशाने मुक्ताईनगर तालुक्यातील चिंचखेडा बुद्रुक येथील विवाहितेने पती व सासूच्या त्रासाला कंटाळून विष प्राशन करून आत्महत्या केल्याची घटना घडली आहे. याप्रकरणी मुक्ताईनगर पोलीसात पतीसह सासरच्या मंडळीविरोधात गुन्हा दाखल करण्यात आला आहे.
याबाबत मिळलेल्या माहितीनुसार, तक्रारदार पार्वताबाई वसंता खराटे (रा.आलमपूर, ता.नांदुरा, जि.बुलढाणा) यांची कन्या यशोदा उर्फ योगीता अनिल खोंदले (वय-२५) हिचा २०११ मध्ये चिंचखेडा येथील अनिल तुकाराम खोंदले यांच्याशी विवाह झाला होता. पार्वताबाई यांच्या पतीचे २५ वर्षांपूर्वी निधन झाले असून त्यांची शेती बुडीत क्षेत्रात गेल्याने शासनाकडून त्यांना सात लाखांची भरपाई मिळाली होती. ही बाब खोंदले कुटुंबियांना कळाल्याने त्यांनी यशोदाचा लग्नानंतर घर बांधण्यासाठी दोन लाख रुपये आणावेत. म्हणून सातत्याने शिवीगाळ व मारहाण करून छळ सुरू केला होता. मुलीचा होणारा छळ पाहता पार्वताबाई यांनी खोंदले कुटुंबियांना ५० हजार रुपये दिल्यानंतर जानेवारी २०१७ मध्ये मुलीला नांदवण्यासाठी नेण्यात आले. मात्र छळ कायम सुरू राहिला. छळ असह्य झाल्याने 16 मार्च 2017 रोजी सकाळी यशोदाने आपल्या आईला फोन करून त्रासाची माहिती देत माहेरी नेण्याची विनंती केली होती.
मात्र, दुपारी चुलत दीर विकास खोंदले यांनी यशोदाने विषारी द्रव प्राशन करून आत्महत्या केल्याची माहिती दिली होती. सुरुवातीला मयत विवाहितेच्या पतीने मुक्ताईनगर पोलिसात पत्नी संतापी असल्याचे सांगत ती नेहमीच भांडण करीत असल्याने तिने संतापात कापसावर फवारणीचे कीटकनाशक प्राशन केल्याचे भासवत मुक्ताईनगर पोलिसात सुरुवातीला अकस्मात मृत्यूची नोंद केली होती.
