धुळे (प्रतिनिधी) भाटपुरा येथे शिरपूर- शहादा रस्त्यावर शिंगावे फाट्याजवळ सायकलस्वाराला वाचविण्याच्या प्रयत्नात मोटारसायकल घसरुन झालेल्या अपघातात मोटारसायकलस्वार व्यक्ती ठार तर दोघे जखमी झाल्याची घटना घडली आहे. याप्रकरणी शिरपूर शहर पोलीस ठाण्यात नोंद करण्यात आली आहे.
वाडी येथील गुरुदास विठ्ठल गुजर (५५) व रहीम सत्तार शहा फकीर (४०) हे दोघे दि. २६ रोजी रात्री ८.३० वाजेच्या सुमारास मोटारसायकलने शिरपुरकडुन वाघाडीकडे जात होते. याचवेळी शिंगावे फाट्याजवळ खेमचंद धाकड यांच्या शेतासमोर सायकलस्वार सुभाष निलकंठ कोळी (४५) यांना वाचविण्याच्या प्रयत्नात मोटारसायकल घसरली.
या अपघातात तिघे जखमी झालेत. त्यात गुरुदास पाटील हे गंभीर जखमी झाले होते. त्यांना शिरपूर उपजिल्हा रुग्णालयात दाखल करण्यात आले. या ठिकाणी डॉ. संदेश आगळे यांनी गुरुदास पाटील यांना तपासून मृत घोषित केले. सुभाष कोळी यांना पुढील उपचारासाठी धुळे येथे रवाना करण्यात आले. याप्रकरणी चंदुलाल आनंदा पाटील रा. वाडी, यांनी शिरपूर शहर पोलीस ठाण्यात दिलेल्या माहितीवरुन अकस्मात मृत्यूची नोंद करण्यात आली आहे. तपास पवन ईशी करीत आहेत.
