मुंबई (वृत्तसंस्था) मुंबईच्या हॉटेलमध्ये खासदार मृतावस्थेत सापडल्याच्या घटनेने खळबळ उडाली आहे. दादरा आणि नगर-हवेलीचे खासदार मोहन डेलकर दक्षिण मुंबईमध्ये मृतावस्थेत आढळले आहेत. त्यांचा मृतदेह मरीन ड्राइव्हवरील हॉटेल सी ग्रीनमध्ये आढळला. पोलिसांनी आत्महत्येची शक्यता व्यक्त केली आहे. तसेच त्यांच्या रुममध्ये एक गुजराती भाषेत लिहीलेली सुसाइड नोट सापडली आहे. पोलिसांनी त्यांचा मृतदेह पोस्ट मॉर्टमसाठी पाठवला आहे.
डेलकर यांचे वय ५८ वर्षे होते. ते १९८९ मध्ये पहिल्यांदा खासदार झाले होते. तेव्हापासून आतापर्यंत ते ७ वेळा लोकसभेत निवडून गेले आहेत. त्यांनी १९८९ पासून २००४ पर्यंत सलग ६ वेळा लोकसभेत विजय मिळवला. डेलकर यांच्या पश्चात पत्नी कलाबेन डेलकर, दोन मुले अभिनव आणि दिविता आहेत. दरम्यान मुंबई पोलिसांचा घटनास्थळी तपास सुरू आहे. त्यांनी कुठल्याही कारणाला अद्याप पुष्टी दिलेली नाही. पण खासदाराच्या अशा मृत्यूने शहरातच नव्हे तर देशात खळबळ उडाली आहे.
मोहन डेलकर यांनी भाजप, काँग्रेस आणि अपक्ष निवडणूक लढवल्या आहेत. त्यांनी १९९१ आणि १९९६ मध्ये काँग्रेसमधून निवडणूक लढवली आणि जिंकली. यानंतर १९९८ च्या निवडणुकीत भाजपकडून विजय मिळवला. १९९९ मध्ये त्यांनी अपक्ष निवडणूक लढवली आणि विजयी झाले. २००४ मध्ये त्यांनी भारत नवशक्ति पार्टी नावाने पक्ष स्थापन केला आणि परत एकदा विजयी झाले. २०१९ मध्येही अपक्ष राहून विजयी झाले होते.
