मुंबई (वृत्तसंस्था) मुंबईच्या महापौर किशोरी पेडणेकर यांना जीवे मारण्याची धमकी देण्यात आलीय. एका अज्ञात व्यक्तीने फोन करून ही धमकी दिलीय. किशोरी पेडणेकर यांना धमकी देणाऱ्याने अर्वाच्च भाषेत शिवीगाळही केलीय. २१ डिसेंबरला मुंबई महापालिका कार्यालयात असताना धमकी दिली गेली होती. याबाबत करण्यात आलेल्या तक्रारीवरून आझाद मैदान पोलीस ठाण्यात गुन्हा दाखल करण्यात आल्याची माहिती देण्यात आली आहे.
पोलिसांनी दिलेल्या माहितीनुसार, २१ डिसेंबर रोजी एका अनोळखी नंबरवरून किशोरी पेडणेकर यांना फोन आला. कॉल करणाऱ्या व्यक्तीने आपले नाव न सांगता पेडणेकर यांना जीवे मारण्याची धमकी दिली. ही व्यक्ती हिंदी भाषेत बोलत होती. त्याने महापौरांना अर्वाच्च भाषेत शिवीगाळही केली. सायंकाळी सहा वाजताच्या सुमारास पालिका मुख्यालयात असतानाच पेडणेकर यांना हा धमकीचा फोनकॉल आला होता. त्यानंतर दोन दिवसांनी याबाबत जवळच्या आझाद मैदान पोलीस ठाण्यात तक्रार करण्यात आली. त्या तक्रारीच्या आधारे पोलिसांनी भारतीय दंड विधानाच्या कलम ५०४, ५०६ (२), ५०७, ५०९ अन्वये गुन्हा दाखल केला आहे व आरोपीचा शोध सुरू करण्यात आला आहे. पोलिसांनी या प्रकरणाबाबत कमालीची गुप्तता बाळगली आहे. अत्यंत नियोजनबद्धपणे आरोपीचा शोध घेतला जात आहे. सूत्रांच्या म्हणण्यानुसार, आरोपीचा शोध लागला असून त्याच्या मुसक्या आवळण्यासाठी शेजारच्या राज्यात एक पथक रवानाही करण्यात आलेले आहे. मात्र, या माहितीला अधिकृत दुजोरा कोणत्याही अधिकाऱ्याने दिलेला नाही.
गेल्या काही दिवसांपासून किशोरी पेडणेकर सातत्यानं भाजपवरही हल्लाबोल करत होत्या. ईडीच्या चौकशीवरूनही त्यांनी भाजप नेत्यांवर निशाणा साधला होता. ”ईडी ही आपल्या देशाची महत्त्वाची संस्था आहे. जे काही सत्य आहे ते पारदर्शकपणे जनतेसमोर येईल. आवाज दाबण्याचा प्रयत्न केला जातो आहे असे जनतेचे देखील मत आहे. यामुळे विरोधकांना आयते कोलीत हातात मिळाले आहे. परंतु निश्चितपणे जे सत्य आहे ते बाहेर येईल,” अशी प्रतिक्रिया मुंबईच्या महापौर किशोरी पेडणेकर यांनी दिली होती.
