मुंबई (वृत्तसंस्था) मुंबई पोलीस दलामध्ये कार्यरत असलेले ४० वर्षीय पोलीस कर्मचाऱ्याने राहत्या घरी पंख्याला गळफास घेऊन आत्महत्या केली आहे. अंधेरी भागात राहणाऱ्या सुरेश चव्हाण यांनी गळफास घेऊन आपलं आयुष्य संपवलं आहे.
यासंदर्भात अधिक असे की, सुरेश चव्हाण हे ठाण्यातील मुंब्रा पोलीस स्टेशनमध्ये तैनात होते. रविवारी रक्षाबंधनाच्या निमित्ताने त्यांची पत्नी दोन मुलांसह भावाकडे गेली होती. रात्री उशिरा तिघं घरी आले, तेव्हा दरवाजा वाजवूनही बराच वेळ आतून काहीच प्रतिसाद मिळाला नाही. अखेर शेजाऱ्यांच्या मदतीने त्यांच्या पत्नीने दरवाजा तोडला, तेव्हा सुरेश चव्हाण हे खोलीतील पंख्याला लटकलेल्या अवस्थेत सापडले. सुरेश चव्हाण यांनी गळफास घेतल्याची माहिती मिळाल्यानंतर एमआयडीसी पोलिसांनी घटनास्थळी धाव घेत त्यांना जवळच्या रुग्णालयात नेले. मात्र डॉक्टरांनी दाखल करण्यापूर्वीच त्यांना मृत घोषित केले. पोलिसांनी अपघाती मृत्यूची नोंद करत या प्रकरणी अधिक तपास सुरु केला आहे.
