पहूर (प्रतिनिधी) वृद्ध महिलेच्या घरात घुसून वृद्ध महिलेच्या अंगावरील सोने चांदीचे दागिने चोरून खून केल्याची घटना उघडकीस आली आहे. पहूर पोलीस स्थानकात बब्बु सांडू तडवी याच्याविरुद्ध गुन्हा दाखल करण्यात आला असून आरोपीला अटक करण्यात आली आहे.
यासंदर्भात अधिक असे की, दि. २१ जून २०२२ रोजी मानबाबाई सरदार तडवी (वय ८५ रा गोद्री ता. जामनेर) या आपल्या तीन पत्राच्या घरात झोपल्या होत्या. यावेळी बब्बु सांडू तडवी (वय २७ भारुडखेडा पहूर) याने रात्रीच्या दरम्यान घरात प्रवेश करुन हाताने गळा दाबून मानबाबाई यांचा खून केला. त्यानंतर २० हजार रुपये किंमतीच्या ४ ग्रॅम वजनाच्या २ बाळ्या, १२ हजार ६०० रुपये किंमतीच्या २ चांदीच्या पाटल्या, असे एकूण ३२ हजार ६०० रुपयांचे अंगावरील दागीने जबरीने काढुन घेतले. याप्रकरणी मानबाबाई यांची सून शेनफडाबाई बलदार तडवी (वय ५५ रा. गोंद्री ता. जामनेर) यांनी दिलेल्या फिर्यादीवरून पहूर पोलीस स्थानकात बब्बु सांडू तडवी याच्याविरुद्ध गुन्हा दाखल करण्यात आला असून आरोपीला अटक करण्यात आली आहे. तसेच पुढील तपास पोलीस निरीक्षक प्रताप इंगळे करीत आहेत.
