जळगाव (प्रतिनिधी) मराठा विद्याप्रसारक संस्थेच्या वाद प्रकरणी दाखल गुन्ह्यात पुण्याहून आलेले पोलिसांचे एक पथक आज दुपारी पीकअप व्हॅन भरून कागदपत्र घेऊन गेल्याची माहिती सूत्रांनी दिली आहे. तर दुसरीकडे या गुन्ह्यातील काही साक्षीदारांचे जाबजबाब घेण्याचे काम सुरु असल्याचे कळते.
मराठा विद्याप्रसारक संस्थेच्या संचालकांचे राजीनामे घेऊन संस्था माजी मंत्री गिरीश महाजन यांच्या ताब्यात द्यावी यासाठी दबाव टाकून अॅड. विजय पाटील, महेश पाटील यांचे अपहरण करत त्यांना पुण्यातील एका फ्लॅटमध्ये डांबून ठेवत मारहाण केली. याप्रकरणी कोथरूड पोलिसात दाखल गुन्ह्याच्या तपासासाठी पुण्यातून पोलिसांचे एक पथक रविवारी सकाळी जळगावात धडकले होते. या पथकाने एकाच वेळी नीलेश रणजित भोईटे, तानाजी केशवराव भोईटे, महेंद्र वसंत भोईटे, प्रमोद जयंतराव कोळे व प्राचार्य डॉ. लक्ष्मण प्रताप देशमुख या पाच जणांच्या घराची सकाळी आठ वाजेपासून झाडाझडती घ्यायला सुरुवात केली होती. दरम्यान, संशयित प्रमोद काळे यांच्या घरझडतीत मविप्र संस्थेचे शिक्के व कागदपत्र मिळून आली. काळे हे सेवानिवृत्त असून देखील त्यांच्याकडे संस्थेचे दप्तर आढळून आल्याचे कळते. तर दुसरीकडे इतर संशयितांच्या घरातून तब्बल पीकअप व्हॅन क्र(एमएच.१९ बीएम २०४७ ) भरून कागदपत्र घेऊन एक पथक आज दुपारी ३ वाजेच्या सुमारास पुण्याचे दिशेने रवाना झाल्याचे कळते.
साक्षीदारांचे जबाब घेण्याचे काम सुरु
पुण्याचे पथकातील एसीपी सुषमा चव्हाण यांच्या मार्गदर्शनाखाली एक पथक शासकीय विश्रामगृहात महत्वपूर्ण साक्षीदारांचे जबाब नोंदविण्याचे काम करत असल्याची माहिती सूत्रांनी दिली आहे. तर दुसरीकडे पथकातील काही कर्मचारी महापालिका आणि जिल्हा पेठ पोलीस स्थानकात जाऊन काही माहिती गोळा केल्याचेही कळतेय. दरम्यान, य संदर्भात एसीपी सुषमा चव्हाण यांच्याही संपर्क साधला असता, कारवाई अद्याप सुरु असल्याचे सांगून अधिकची माहिती देण्यास नकार दिला.
